وزیراعلی پنجاب چوہدری پرویز الہیٰ نے صحت کارڈ کی ادائیگیوں کیلئے وزیراعظم شہباز شریف کو خط لکھ دیا ہے۔
تفصیلات کے مطابق وزیراعلی پنجاب چوہدری پرویز الہیٰ کی زیر صدارت اہم اجلاس ہوا ، اجلاس میں صوبائی کابینہ ارکان ، چیف سیکرٹری، سیکرٹری فنانس، سیکرٹری سپیشلائزاڈ ہیلتھ کیئر اینڈ میڈیکل ایجوکیشن، چیف ایگزیکٹیو آفیسر پی ایچ آئی ایم سی سمیت دیگر متعلقہ افسران اور سابق وفاقی وزیر مونس الہیٰ نے خصوصی شرکت کی۔
اجلاس میں گفتگو کرتے ہوئے وزیر اعلی پنجاب کا کہنا تھا کہ ہیلتھ کارڈ منصوبہ سابق وزیراعظم عمران خان کا فلیگ شپ تاریخی پروگرام ہے، پنجاب حکومت نے اس منصوبے کی مد میں 100 فیصد ادائیگی کردی ہے، تاہم وفاقی حکومت نے ہیلتھ کارڈ کی مد میں 7 ارب روپے سے زائد کی ادائیگیاں کرنی ہیں، وفاقی حکومت عوام کی فلاح و بہبود کیلئے ایک روپیہ خرچ نہیں کررہی۔
انہوں نے مزید کہا کہ ہیلتھ کارڈ منصوبے کے تحت پنجاب کی پوری آبادی کو بلاامتیاز ہیلتھ کوریج فراہم کی جارہی ہے، صوبے کے821 ہسپتالوں میں ہیلتھ کارڈ پر مفت علاج ہورہا ہے، اب تک 28 لاکھ افراد اس منصوبے سے مستفید ہوچکے ہیں، نا صرف پنجاب بلکہ آزاد کشمیر ،گلگت بلتستان اور اسلام آباد کے شہریوں کو بھی ہیلتھ کارڈ کی سہولت پنجاب حکومت کی جانب سے فراہم کی جارہی ہے۔