عمران خان کی وزارت عظمیٰ برطرفی کے بعد زیادہ تر شوبز شخصیات ناراض نظر آرہی ہیں۔ تحریک عدم اعتماد کی کامیابی کے بعد شہباز شریف کے وزیراعظم بننے پر شوبز کے کچھ فنکارخوش ہیں تو چند ناراض بھی ہیں۔
عمران خان کے وزارت عظمیٰ سے ہٹنے کے بعد فنکار ایک طرف ناراضگی کا اظہار کر رہے ہیں تو کچھ شہبازشریف کے بھی حق میں سامنے آ رہے ہیں اور شہبازشریف کو وزارت عظمیٰ ملنے پر انہیں مبارکباد پیش کر رہے ہیں۔
شہبازشریف کے پاکستان کے 23ویں وزیراعظم بننے پر شوبز شخصیات مختلف انداز میں تبصرے کرتی نظر آرہی ہیں۔ اداکارہ ارمینا خان نے اپنے ٹوئٹ میں لکھا "آپ میرے وزیراعظم نہیں ہیں"، یہ بات یاد رکھیے گا۔
دوسری جانب اداکارہ حنا خواجہ بیات نے انسٹاگرام پر شہباز شریف کی تصویر کے ساتھ لکھا "عدالت سے ضمانت پر ملزم کو سرکاری نوکری نہیں مل سکتی لیکن وہ وزیراعظم بن سکتا ہے"۔
دوسری جانب اداکار فہد مصطفیٰ نے شہباز شریف کو پاکستان کا وزیراعظم بننے پر مبارکباد دی اور امید ظاہر کی کہ وہ اس ملک کی بہترین خدمت کریں گے۔ ٹوئٹ کے آخر میں فہد مصطفیٰ نے پاکستان زندہ باد بھی لکھا۔
ادھر اداکارہ ریشم بھی شہباز شریف کے وزیراعظم بننے پر بہت خوش نظر آئیں۔ انہوں نے انسٹاگرام پر ایک ویڈیو پیغام میں "شہباز شریف زندہ باد" کا نعرہ لگایا تھا۔
