وفاقی حکومت نے مبینہ آڈیو لیک کے معاملےپر سابق وزیر خزانہ شوکت ترین کے خلاف مقدمہ درج کروانےکا فیصلہ کرلیا ہے۔
خبررساں ادارے کی رپورٹ کے مطابق یہ خبر خود وفاقی وزیر رانا تنویر حسین کے ایک بیان میں سامنے آئی جس میں ان کا کہنا تھا کہ ہماری قانونی ٹیم شوکت ترین کے خلاف مقدمہ تیار کرنے کیلئےکام کررہی ہے، ہمارےپاس اطلاعات ہیں کہ آئی ایم ایف کو خط عمران خان کی مرضی سے لکھا گیا تھا۔
انہوں نے عمران خان کو تنقید کا نشانہ بناتے ہوئے کہا کہ پورا ملک سیلاب میں ڈوبا ہوا ہے مگر عمران خان جلسوں میں مصروف ہیں، ملک میں مہنگائی کی شرح میں اضافے کو کنٹرول کرنے کی ذمہ داری صوبائی حکومتوں کی ہے،ملک کو دیوالیہ ہونے سے بچانے کیلئےہمیں مشکل فیصلے کیے۔
وفاقی وزیر راناتنویر نے کہا کہ اس حکومت نے چار سالہ دور میں گیس کا کوئی نیا معاہدہ نہیں کیا، ہماری پارٹی میں اختلاف کی باتوں میں کوئی صداقت نہیں ہے، نواز شریف کے مقدمات حکومت ختم نہیں کرے گی بلکہ نواز شریف خود عدالتوں سے سرخرو ہوں گے۔
