حکمران جماعت کے سینئر قائدین کے خلاف اہم کیسز پر کام کرنے والے نیب افسران کا تبادلہ کردیا گیا ہے۔
تفصیلات کے مطابق وزیراعظم شہباز شریف، وفاقی وزیر داخلہ رانا ثناءاللہ، مریم نواز، خواجہ آصف اور علیم خان جیسے سینئر ن لیگی رہنماؤں کے خلاف جن نیب کے افسران نے تحقیقات کی تھیں ان کا تبادلہ کردیا گیا ہے۔
صحافی و اینکر پرسن امیر عباس نے نیب کی جانب سے جاری کردہ نوٹیفکیشن کی نقل شیئر کی اور کہا کہ حکومت نواز قائم مقام نیب چیئرمین نے سپریم کورٹ کے احکامات کی دھجیاں اڑاتے ہوئے نیب لاہور کے اہم افسران کا تبادلہ کردیا ہے۔
انہوں نے مزید کہا کہ یہ افسران اہم ترین شخصیات کے خلاف کیسز پر کام کررہے تھے، اب تو قانون جوتے کی نوک بن چکا ہے۔
نجی ٹی وی چینل کے انویسٹی جرنلسٹ محمد حسن رضا نے بھی اس نوٹیفکیشن کی نقل شیئر کی اور کہا کہ ٹی ٹی کیس سمیت اہم شخصیات کے خلاف کیسز بنانے والےنیب لاہور کے افسران کے تبادلےکردیے گئے ہیں۔
انہوں نے مزید کہا کہ مریم نواز، حمزہ شہباز کو گرفتار کرنے والے ایڈیشنل ڈائریکٹر نیب کا تبادلہ سکھر کردیا گیا ہے، ندیم احمد شیخ کو لاہور سے نیب ہیڈ کوارٹر ٹرانسفر کردیا گیا ہے،جبکہ خاور الیاس کو نیب بلوچستان میں تعینات کردیا گیا ہے، اگلے مرحلے میں تمام کیسز ختم ہوں گے۔
جیو نیوز سے منسلک صحافی اعزاز سید نے کہا کہ نیب میں تازہ تبادلوں کے دوران لاہور سے ان افسران کو بھی تبدیل کردیا گیا ہے جو وزیراعظم شہبازشریف اور ان کے بچوں کیخلاف منی لانڈرنگ کیس کی تحقیقات کررہے تھے۔
جیو نیوز کی رپورٹ کے مطابق نیب کے 13 ڈائریکٹر تبدیل کیے گئے جن میں سے 4 کا تعلق لاہور سے ہے، شہباز شریف کی گرفتاری میں کلیدی کردار ادا کرنے والے، فواد حسن فواد اور احد چیمہ کے خلاف تحقیقات کرنے والے افسران بھی تبادلہ ہونے والے افسران میں شامل ہیں۔
- Featured Thumbs
- https://www.siasat.pk/data/files/s3/8nablahoretabdly.jpg
