پاکستان کے معروف فلم اسٹار اداکار شان شاہد نے سوشل میڈیا پر جاری ایک پیغام میں کہا کہ عمران خان ہمارے دلوں کی امید ہیں۔
اداکار شان نے سماجی رابطے کی ویب سائٹ ٹوئٹر پر جاری ایک بیان میں وزیراعظم کو ٹیگ کرتے ہوئے کہا ہے کہ عمران خان آپ نے ہمیں بدعنوانوں کے خلاف آواز اٹھانے کے خوف سے نجات دلائی۔ آپ نے ہمیں وہ ہمت دی کہ جس کے ساتھ ہم بدعنوان عناصر سے سوال کر سکتے ہیں۔
انہوں نے کہا کہ عمران خان نے ہمیں ماضی کے حکمران خاندانوں کی غلامی بھری نیند سے بیدار کیا ہے وہی ہمارے دلوں کی آخری امید ہیں۔ جو آپ سے لڑ رہے ہیں وہ یہ نہیں جانتے کہ ہم سب بھی عمران ہیں۔
یاد رہے کہ اپوزیشن کی حالیہ حکومت مخالف تحریک کے نتیجے میں جہاں ایک طرف اپوزیشن اور اس کے حامی عمران کان کے خلاف مہم چلائے ہوئے ہیں وہیں اداکاروں سمیت تمام شعبہ ہائے زندگی سے تعلق رکھنے والی شخصیات ان سے اظہار یکجہتی کرتی اور ان کے حق میں بیانات دیتی دکھائی دیتی ہیں۔
گزشتہ روز بھی اداکار بلال قریشی اور اس سے پہلے منیب نے بھی وزیراعظم عمران خان کے حق میں بیانات جاری کیے تھے اور ان کی ایمانداری کی گواہیاں دی تھیں۔