پارک ویوو سوسائٹی نے سوشل میڈیا پر ویڈیو وائرل ہونے کے بعد اوورسیز پاکستانی کے معاملے کا نوٹس لے لیا۔
تفصیلات کے مطابق استحکام پاکستان پارٹی کے صدر علیم خان کی نجی ہاؤسنگ سوسائٹی پارک ویو کی جانب سے اوور سیز پاکستانی کو مبینہ طور پر ایک کروڑ کا چونا لگانے کے معاملے پر ایکشن لے لیا گیا ہے۔
متاثرہ شخص کی سوشل میڈیا پر ویڈیو وائرل ہونے اور سوشل میڈیا پر متعدد لوگوں کی جانب سے ان کے حق میں آواز بلند کرنے کے بعد نجی ہاؤسنگ سوسائٹی کو ہوش آیا اور انہوں نے متاثرہ شخص کو دفتر بلا کر ان کی شکایات کا مداوا کیا۔
مائیکروبلاگنگ ویب سائٹ ٹویٹر پر پارک ویو سٹی اسلام آباد کی جانب سے متاثرہ شخص کی سوسائٹی کے دفتر میں لی گئیں تصاویر شیئر کیں اور کہا کہ صارفین کو مطمئن کرنا ہماری اولین ترجیح ہے، ہم اپنے صارفین کی خدمت کیلئے ہمہ وقت تیار ہیں، ہمارے لیے سب سے اہم یہی ہے کہ ہمارے ممبرز ہمارے ساتھ سرمایہ کاری کرتے ہوئے مطمئن اور خوش ہوں۔
خیال رہے کہ چند روز قبل سوشل میڈیا پر ایک ویڈیو وائرل ہوئی تھی جس میں ایک اوور سیز پاکستانی پارک ویو سٹی کے دفتر کے باہر کھڑا ہوکر دہائیاں دیتا دکھائی دے رہا تھا، اس شخص نے موقف اپنایا کہ سوسائٹی کو اب تک 1 کروڑ روپیہ دے چکا ہے اور اب کہا جارہا ہے کہ اوورسیز بلاک میں اس کا کوئی پلاٹ نہیں ہے۔
متاثرہ شخص کو ویڈیو بنانے سے روکتے ہوئے ہاؤسنگ سوسائٹی کے دفتر کے باہر تعینات گارڈز نے اس شخص کو دھکے دیئے اور موبائل فون چھیننے کی کوشش بھی کی تھی، متاثرہ شخص نے حکومت، چیف جسٹس اور آرمی چیف سے انصاف کی اپیل کی تھی۔
