چیئرمین تحریک انصاف عمران خان نے ٹویٹ پنجاب حکومت پر کڑی تنقید کردی، انہوں نے لکھا پنجاب کے سابق سینئر وزیر میاں اسلم اقبال نے اس ابتلا و آزمائش کی روداد قلمبند کی ہے جس سے ان کے اہلِ خانہ اس فسطائی حکومت کے ہاتھوں گزر رہے ہیں، ان کی 80 سالہ ضعیف ماں سے لیکر بھائیوں تک کسی کو بھی معاف نہیں کیا گیا اور ان کے عزیز واقارب سمیت جس کسی پر بھی یہ مجرم ہاتھ ڈال سکتے تھے، اس کی تذلیل کی گئی۔
عمران خان نے مزید کہا چونکہ قومی میڈیا کا گلا پوری طرح گھونٹا جاچکا ہے چنانچہ سوشل میڈیا کے ذریعے ہر فرد کو اس وحشت و سفاکیّت سے آگاہ کیا جائے جو انتخابی میدان سے باہر رکھنے کیلئے پاکستان کی سب سے بڑی سیاسی جماعت کیخلاف آزمائی جارہی ہے۔
لاہور پولیس نے سابق سینئر وزیر پنجاب میاں اسلم اقبال کا گرفتاری کےلیے خاکہ جاری کیا تھا،پولیس ذرائع کے مطابق 9 مئی کو جناح ہاؤس اور دیگر تنصیبات پر حملوں کے کیس میں میاں اسلم اقبال کی گرفتاری کے لیے چھاپے مارے تھے۔
لاہور پولیس نے اقبال ٹاؤن اور داروغے والا کے علاقوں میں سابق صوبائی وزیر کی گرفتاری کے چھاپے مارے۔
پولیس ذرائع کے مطابق میاں اسلم اقبال کا خاکہ جاری کردیا گیا ہے، سابق صوبائی وزیر کے فرنٹ مین ثاقب شاہ کو بھی تلاش کر رہے ہیں،میاں اسلم اقبال فوجی تنصیبات پر حملے میں ملوث ہیں اور جیو فینسنگ کے مطابق انہوں نے 9 مئی کو 16 بار فون کرکے شرپسندوں کو اُکسایا۔
ذرائع کے مطابق لاہور پولیس نے سابق سینئر وزیر پنجاب کی گرفتار کےلیے گھیرا تنگ کردیا ہے اور اُن کے بھائی اکرم اور بھتیجے حمزہ اکرم کو حراست میں لیا ہے،پولیس کا دعویٰ ہے کہ ملزم حمزہ جانتا ہے کہ اسلم اقبال کہاں چھپے ہوئے ہیں۔
