خیبر میں سیکیورٹی فورسز کی کارروائی، 4 خارجی ہلاک، رنگ لیڈر مارا گیا

karam.jpg


ضلع خیبر کے علاقے باغ میں سیکیورٹی فورسز کی کارروائی میں چار خارجی دہشت گرد ہلاک ہوگئے جن میں ایک اہم رنگ لیڈر عزیر الرحمٰن عرف قاری اسمٰعیل بھی شامل تھا۔

پاک فوج کے شعبہ تعلقات عامہ (آئی ایس پی آر) کے مطابق، سیکیورٹی فورسز نے دہشت گردوں کی موجودگی کی خفیہ اطلاع کے بعد یہ کارروائی کی۔

ہلاک ہونے والوں میں رنگ لیڈر عزیر الرحمٰن عرف قاری اسمٰعیل کے علاوہ رنگ لیڈر مخلص بھی شامل تھا جو سیکورٹی فورسز سے مقابلے میں مارا گیا۔

یہ واقعہ اس وقت سامنے آیا جب دو روز قبل بلوچستان کے ضلع ژوب میں بھی سیکیورٹی فورسز نے افغانستان سے دراندازی کی کوشش ناکام بناتے ہوئے 6 خارجی دہشت گردوں کو ہلاک کیا تھا۔

آئی ایس پی آر نے بتایا کہ 22/23 جنوری کی رات کو ایک گروپ پاکستان-افغانستان سرحد سے دراندازی کرنے کی کوشش میں تھا۔

سیکورٹی فورسز نے ضلع ژوب کے علاقے سمبازہ میں انہیں ٹریس کر کے ناکام بنایا اور چھ دہشت گردوں کو ہلاک کیا۔ ہلاک ہونے والوں سے بھاری مقدار میں اسلحہ، گولہ بارود اور دھماکا خیز مواد بھی برآمد ہوا۔

آئی ایس پی آر کے مطابق، پاکستان نے افغانستان کی عبوری حکومت سے مطالبہ کیا ہے کہ وہ سرحد پر مؤثر بارڈر مینجمنٹ کو یقینی بنائے۔

پاک فوج کے شعبہ تعلقات عامہ نے توقع ظاہر کی ہے کہ افغان عبوری حکومت اپنی ذمہ داریاں پوری کرے گی اور خوارج کو پاکستان کے خلاف دہشت گردی کے لیے افغان سرزمین کا استعمال نہیں کرنے دے گی۔
 

Back
Top