وفاقی حکومت نے خلیجی ممالک کی اہم شخصیات کی درآمدات پر عائد کسٹم ڈیوٹی ختم کرنے کا فیصلہ کرلیا ہے۔
ہم نیوز کے مطابق وفاقی حکومت کی جانب سے نئے مالی سال کے پیش کردہ فنانس بل میں سعودی عرب، متحدہ عرب امارات، قطر اور بحرین کی اہم اور معزز شخصیات کی درآمدی اشیاء پر کسٹم ڈیوٹی میں چھوٹ دینےکی تجویز دی گئی ہے، جن اشیاء کی درآمد پر کسٹم ڈیوٹی کی چھوٹ ہوگی ان میں گاڑیاں، گھریلو سامان، ذاتی اشیاء اور عطیہ کی جانے والی چیزیں شامل ہوں گی۔
سعودی عرب ، متحدہ عرب امارات، قطر اور بحرین کی جن شخصیات کو یہ چھوٹ دی گئی ان میں زیادہ تر کا تعلق ان ممالک کے شاہی خاندانوں یا حکمرانوں سے ہے۔
حکومت نے اس شخصیات کو ڈیوٹی میں چھوٹ دینے کیلئے کچھ قواعد وضوابط بھی وضع کیے ہیں ، جیسا کہ اگر ان شخصیات کی جانب سے کوئی گاڑی درآمد کی جاتی ہے تو اس کی مکمل تفصیلات فراہم کی جائیں گی، جس میں گاڑی کے مالک کا نام اور دیگر درآمدی تفصیلات شامل ہیں، مذکورہ ملک کو ہر چھ ماہ بعد اس فہرست کو اپ ڈیٹ کرنا ہوگا۔
پاکستان کی وزارت خارجہ ڈیوٹی میں رعایت یا چھوٹ کا سرٹیفکیٹ جاری کرے گی، وزارت خارجہ کی سفارشات کی روشنی میں ایف بی آر مذکورہ شخصیات کے علاوہ کسی اور شخص کو یہ سہولت دینے کیلئے سرٹیفکیٹ جاری کرسکے گا،مذکورہ ملک کسی بھی پاکستانی ایجنٹ کو اپنا نمائندہ مقر ر نہیں کرسکتا، اس ملک کس سفارتخانہ اس بات کو یقینی بنائے گا کہ کسی بھی پاکستانی کو ڈیوٹی فری گاڑی کی اجازت نہیں دی جائے گی۔
