پی ٹی آئی کے سابق رہنما محمود مولوی کا کہنا ہے کہ فواد چوہدری، عمران اسماعیل اور علی زیدی نے جہانگیر ترین گروپ جوائن کرلیا ہے۔شاہ محمودقریشی بھی جلد فیصلہ کرلیں گے۔
نجی چینل اے آروائی سے گفتگو کرتے ہوئے محمودمولوی کا کہنا تھا کہ عمران اسماعیل اور علی زیدی نے تقریر کرکے جہانگیرترین گروپ جوائن کرلیا جبکہ فوادچوہدری بھی حصہ بن گئے ہیں۔
محمود مولوی نے کہا کہ شاہ محمود قریشی بھی ایک دو دن میں کوئی فیصلہ کرلیں گے، پرویز خٹک بھی کے پی میں ہیں ان سے بات چیت چل رہی ہے۔
محمود مولوی نے عمران خان کو مشورہ دیا کہ وہ تحریک انصاف کی قیادت چھوڑدیں اور کسی اور کو قیادت کرنے دیں۔
محمود مولوی نے کہا کہ یہ سب قدر آور سیاست دان ہیں جو ملک و قوم کے حق میں بہتر ہوگا وہ فیصلہ کریں گے، یہ لوگ چیئرمین پی ٹی آئی سے راہیں جدا کرتے ہیں تو حیرانی نہیں ہوگی، وقت کا تقاضا ہے اور انسان اس کے مطابق ہی فیصلے کرتا ہے۔
انہوں نے مزید کہا کہ ملک اور عوام کے مفاد میں چیئرمین پی ٹی آئی کو پارٹی سے الگ ہونا چاہیے۔
