بالی ووڈ کے معروف اداکار سیف علی خان کے گھر میں ڈکیتی کی کوشش کی گئی، جس کے دوران مزاحمت پر وہ زخمی ہو گئے۔ بھارتی میڈیا کے مطابق انہیں زخمی حالت میں لیلاوتی اسپتال منتقل کیا گیا۔
یہ واقعہ ممبئی کے علاقے باندرہ میں پیش آیا، جہاں ایک نامعلوم شخص نے چوری کی نیت سے اداکار کے گھر میں گھسنے کی کوشش کی۔
اطلاعات کے مطابق حملہ آور نے سیف علی خان پر چھری سے حملہ کیا۔
میڈیا رپورٹس کے مطابق چور گھر میں داخل ہونے میں کامیاب ہو گیا تھا، تاہم اداکار نے مزاحمت کی، جس دوران وہ زخمی ہو گئے۔اطلاعات کے مطابق سیف علی خان کو ریڑھ کی ہڈی کے قریب زخم آیا۔
اس واقعے کی خبر سامنے آنے کے بعد سیف علی خان کے مداحوں میں شدید غم و غصہ پایا جا رہا ہے۔