بڑے صنعتکار حکومت کی معاشی پالیسی سے نالاں ہیں, صنعتکاروں نے حکومت کی معاشی پالیسی پر عدم اعتماد کا اظہار کرتے ہوئے کہا ملکی معیشت کو وینٹی لیٹر سے نکالنے کے لیے حکومت شرح سود سنگل ڈیجٹ اور فی یونٹ بجلی 9 سینٹ پر لانے کا اعلان کرے۔
کراچی میں مشترکہ نیوز کانفرنس کے دوران ایوان صنعت و تجارت پاکستان کے قائم مقام صدر ثاقب فیاض مگوں، یو جی بی گروپ کے پیٹرن انچیف ایس ایم تنویر اور رکن قومی اسمبلی مرزا اختیار بیگ سمیت دیگر صنعتکاروں نے حکومت پر عدم اعتماد کا اظہار کیا اور کہا حکومتی معاشی پالیسیوں کی وجہ سے معیشت وینٹی لیٹر پر چلی گئی ہے۔
انہوں نے کہا کہ آئی پی پیز کے ساتھ معاہدوں کا ازسر نو جائزہ لے کر ملک کو گرین انرجی سے فائدہ اٹھانے کا موقع دیا جائے جبکہ حکومت آسان اور قابل عمل موسم سرما پیکج کا اعلان کرے
صنعتکاروں نے کہا کہ وفاقی ریونیو بورڈ صنعتکاروں کو ہراساں کر رہا ہے اور ایف آئی آر درج کرنے کی باتیں کر رہا ہے، تاہم واضح کہہ رہے ہیں کہ کسی بھی صنعتکار کا نام ایف آئی آر میں نہیں آنا چاہیے,حکومت کسی بھی کارروائی سے پہلے فیڈریشن کو اعتماد میں لے، روزگار اور برآمدات دینے والوں کے خلاف مقدمات نہیں بننے دیں گے.
انہوں نے کہا عوام پر ایک بار پھر ٹیکس لگانے کی تیاری کی جارہی ہے، معیشت کو وینٹی لیٹر سے نکالنے کے لیے شرح سود سنگل ڈیجٹ پر لایا جائے جبکہ حکومت بجلی کی فی یونٹ قیمت 9 سینٹ پر لانے کا اعلان کرے۔
دوسری جانب کراچی چیمبر آف کامرس اینڈ انڈسٹری کے صدر میاں ابرار احمد نے کہا حکومت اور متعلقہ ذمے دار اداروں کی جانب سے کراچی چیمبر کو حالات بہتر کرنے کی ضمانت بھی دی گئی ہے لیکن اس ضمانت کے باوجود شہر میں بھتہ خوری، بدامنی اور جرائم کی شرح کم ہونے کے بجائے بڑھ رہی ہے.بدامنی کے باعث صنعتیں منتقل ہو رہی ہیں
- Featured Thumbs
- https://www.siasat.pk/data/files/s3/pakaehe11n3.jpg
