ٹوئٹر کے نئے مالک اور دنیا کے امیر ترین شخص ایلون مسک نے ایک تصویر شیئر کی جس میں ٹوئٹر کی قبر بنی ہوئی دیکھی جا سکتی ہے، جس کے بعد سے ٹوئٹر صارفین کی جانب سے تبصرے شروع ہوگئے کہ آخر کار ایلون مسک کرنا کیا چاہتے ہیں؟
اس کے علاوہ سماجی رابطے کی ویب سائٹ پر ریسٹ ان پیس کا ہیش ٹیگ بھی چل رہا ہے جس میں ٹوئٹر کے ختم ہونے سے متعلق مزاحیہ تبصرے کیے جا رہے ہیں۔ بش نامی صارف نے کہا کہ ٹوئٹر اچھا چل رہا تھا مگر اب اسے خدا حافظ ساتھ میں ایلون مسک کی تصویر بھی شیئر کی گئی ہے۔
ایک صارف نے کہا کہ وہ 13 سال سے ٹوئٹ کر رہے تھے اور انہیں اس سے خوشی ملتی تھی۔
ایک صارف نے 2006 سے شروع ہونے والے ٹوئٹر کی 2022 میں قبر بنی شیئر کی۔
کوئن نامی صارف نے لکھا کہ ایلون مسک نے اکیلئے اتنی بڑی کمپنی تباہ کر کے رکھ دی ہے۔
کوجو نے کہا کہ وہ یہ سوچ کر غمزدہ ہے کہ ٹوئٹر اب کسی بھی وقت بند ہو سکتا ہے۔
شیریل نے کہا کہ وہ اپنی آنے والی نسلوں کو بتائے گی کہ وہ 2022 میں ٹوئٹر کے بند ہونے سے پہلے کتنی مشہور شخصیت تھی، جبکہ اس کے 3 فالوور تھے۔
ایک صارف نے ایلون کی تصویر شیئر کی جس میں وہ سنک اٹھائے ہوئے ہیں، اس صارف نے کہا کہ وہ تو صرف ٹوئٹر کو ڈبونے آئے تھے۔
ادھر ٹوئٹر کا اپنے دفاتر عارضی طور پر بند کرنے کا بھی اعلان کر دیا ہے، برطانوی میڈیا کے مطابق ٹوئٹر نے عارضی طور پر دفاتر بند کیے ہیں، ٹوئَٹر دفاتر 21 نومبر کو کھولے جائیں گے، تاہم ابھی تک ٹوئٹر کی جانب سے دفاتر بند کرنے کی وجوہات کے بارے میں نہیں بتایا گیا اور نہ ہی ان رپورٹس پر کوئی ردعمل دیا گیا ہے۔
واچ گرو نامی آن لائن پلیٹ فارم کی جانب سے یہ دعویٰ کیا گیا ہے کہ ٹوئٹر انتظامیہ اپنا ہیڈکوارٹر سان فرانسسکو کیلی فورنیا سے امریکی ریاست ٹیکساس میں منتقل کرنا چاہتی ہے۔
