ماہر معیشت ڈاکٹر اشفاق حسن خان نے کہا ہے کہ پیٹرول کی قیمت 265 روپے تک جائے گی، اگلے 50 دنوں میں مزید مہنگائی بڑھے گی۔
جی این این کے پروگرام لائیو ود ڈاکٹر شاہد مسعود میں خصوصی گفتگو کرتے ہوئے ڈاکٹر اشفاق حسن خان نے کہا کہ پیٹرول پر ابھی 30 روپے لیوی کی مد میں شامل کیے جائیں گے اور اس کے بعد 17 فیصد کا جنرل سیلز ٹیکس بھی عائد ہوگا، اس طرح پیٹرول کی قیمت آنے والے دنوں میں 265 روپے کے قریب پہنچ جائے گی۔
انہوں نے مزید کہا کہ پیٹرولیم مصنوعات کے اضافے کے بعد آئی ایم ایف دیکھے گا کہ 10 جون کو جو نیا مالیاتی بجٹ پیش کیا جانا ہے اس میں آئی ایم ایف کی شرائط کی کس حد تک پاسداری کی جاتی ہے ، اور اگر آئی ایم ایف کے مقرر کردہ اہداف کو بجٹ میں شامل کیا گیا، سبسڈیز ختم کی گئیں نئے ٹیکسز عائد کیے گئے تو آئی ایم ایف معاہدے کیلئے رضا مند ہوجائے گا جس کے بعد جولائی میں پاکستان کو ایک ارب ڈالر کی قسط ملنے کا امکان پیدا ہوگا۔
ڈاکٹر اشفاق حسن خان نے کہا کہ ابھی آئی ایم ایف حکومت کے معاشی فیصلوں کو مانیٹر کررہا ہے اس لیے میں یہ دیکھ رہا ہوں کہ اگلے پچاس روز میں پیٹرول ڈیزل کی قیمتوں میں اضافہ ہوگاجس سے مہنگائی کا مزید طوفان آئے گا۔
انہوں نے کہا کہ میں چیخ چیخ کرکہتا رہا کہ آئی ایم ایف کے پاس نا جاؤ اپنے گھر کو ٹھیک کرلو تب کہا جاتا رہا کہ نہیں سب ٹھیک ہے ہم آخری بار آئی ایم ایف سے قرض لے رہے ہیں، اب آپ اس پروگرام سے نکل کر دکھا دیں، آپ کا گلا دبوچ لیا گیا ہے اور اس طرح دبوچا گیا ہے کہ آپ سانس بھی نہیں لے سکتے،اب آپ سانس بھی آئی ایم ایف کی مرضی سے لیں گے