چیئرمین تحریک انصاف عمران خان نے ایک بار پھر واضح کردیا کہ وہ جیل میں ہوں یا جیل سے باہر الیکشن ان کی جماعت ہی جیتے گی، امریکی میڈیا کو انٹرویو میں عمران خان نے کہا معلوم نہیں کہ مجھے نا اہل قرار دے دیا جائے گا یا نہیں ؟ مگر مجھے اس کی پرواہ نہیں کیونکہ پی ٹی آئی تاریخ کی مقبول ترین پارٹی بن چکی ہے،
عمران خان نے کہا حکومت انتخابات کروانے سے خوف زدہ ہے، انہیں ڈر ہے کہ ہم الیکشن جیت جائیں گے، مجھے ہٹانے کی ہر ممکن کوشش کی جا رہی ہے، مجھ پر پہلے ہی قاتلانہ حملہ ہو چکا ہے، میں نہیں جانتا کہ وہ مجھے ڈس کوالیفائی کر پائیں گے یا نہیں؟ اس کی پرواہ بھی نہیں کیونکہ پی ٹی آئی تاریخ کی مقبول ترین پارٹی ہے۔
چیئرمین تحریک انصاف نے مزید کہا جیل میں ہوں یا باہر پارٹی الیکشن جیتےگی، آئینی طور پر 90 دن میں الیکشن ہونے تھے، ہمارے دور میں عدالتی کام میں مداخلت نہیں تھی، جیسے پہلے ہوتا آیا جبکہ ہم نے میڈیا میں بھی مداخلت نہیں کی، میڈیا سے کوئی مسئلہ تھا تو ہماری وجہ سے نہیں،اسٹیبلشمنٹ کی وجہ سے تھا۔
عمران خان نے کہا عالمی کھلاڑی کے طور پر ساری دنیا گھوما ہوں، مانتا ہوں کہ امیر اور غریب ممالک میں فرق قانون کی حکمرانی کا ہے، ہماری لڑائی ہے کہ طاقتور طبقے کو بھی قانون کے نیچے لایا جائے،اگر میں اپنے ملک کے لئے نہیں لڑوں گا تو کون لڑے گا۔
