سپریم کورٹ آف پاکستان میں انتخابات ملتوی کرنے سے متعلق الیکشن کمیشن کے فیصلے کے خلاف پی ٹی آئی کی اپیل پر آج ہونے والی سماعت کے تحریری حکم نامے میں کہا گیا ہے کہ انتخابات میں تاخیر شہریوں کے بنیادی آئینی حقوق متاثر کرنے کے مترادف ہے۔
تفصیلات کے مطابق سپریم کورٹ کی جانب سے الیکشن کمیشن کے انتخابات ملتوی کیے جانے کے فیصلے کے خلاف پاکستان تحریک انصاف کی درخواست پر آج ہونے والی سماعت کا تحریری حکم نامہ جاری کردیا ہے۔
چیف جسٹس عمر عطاء بندیال کی سربراہی میں سپریم کورٹ کے پانچ رکنی بینچ نے کیس کی سماعت کی، سماعت کرنے والے بینچ میں جسٹس اعجاز الاحسن، جسٹس منیب اختر، جسٹس امین الدین خان اور جسٹس جمال مندوخیل شامل تھے۔
سماعت کے تحریری حکم نامے میں کہا گیا ہے کہ تحریک انصاف نے الیکشن کمیشن کی جانب سے انتخابات ملتوی کرنے کا آرڈر چیلنج کیا، پی ٹی آئی کے مطابق الیکشن کمیشن کے پاس انتخابات ملتوی کرنے کا کوئی قانونی اور آئینی اختیار نہیں۔
تحریری حکم نامے کے مطابق بروقت صاف اور شفاف انتخابات یقینی بنانا جمہوری حکومت کیلئے انتہائی اہم ہے، انتخابات میں تاخیر شہریوں کے بنیادی آئینی حقوق متاثر کرنے کے مترادف ہے۔
سپریم کورٹ نے الیکشن کمیشن کو درخواست گزار کی جانب سے اٹھائے گئے اہم قانونی اور حقائق پر مبنی سوالات کا جواب دینے کی ہدایات دیتے ہوئے تمام فریقین کو نوٹسز جاری کردیئے ہیں اور کیس کی سماعت کل صبح تک ملتوی کردی گئی ہے۔
