قومی کرکٹ ٹیم کے سابق کپتان اور وکٹ کیپر راشد لطیف نے چیمپئنز ٹرافی کے لیے منتخب ہونے والی پاکستانی ٹیم پر اعتراضات اٹھائے ہیں۔
جیو نیوز کے پروگرام 'ہنسنا منع ہے' میں میزبان تابش ہاشمی نے سوال کیا کہ چیمپئنز ٹرافی کے لیے قومی ٹیم کے اسکواڈ میں ایسا کون سا کھلاڑی ہے جس کی ٹیم میں جگہ نہیں بنتی؟ اس پر راشد لطیف نے بے ساختہ جواب دیا کہ چھ سات کھلاڑی ایسے ہیں۔
تابش ہاشمی نے جب پوچھا کہ کیا پاکستانی ٹیم چیمپئنز ٹرافی جیت سکتی ہے؟ تو سابق کپتان نے یقین دہانی کرائی کہ پاکستانی ٹیم جیتنے کی صلاحیت رکھتی ہے۔ انہوں نے مزید کہا کہ پانچ سے چھ کھلاڑی ایسے ہوتے ہیں جو آپ کو میچ جتوا سکتے ہیں۔
خیال رہے کہ پاکستان کرکٹ بورڈ (پی سی بی) نے آئی سی سی چیمپئنز ٹرافی 2025 کے لیے 15 رکنی اسکواڈ کا اعلان کیا ہے جس میں بابر اعظم، فخر زمان، کامران غلام، سعود شکیل، اور طیب طاہر بیٹرز کے طور پر شامل ہیں۔ آل راؤنڈرز میں فہیم اشرف، خوشدل شاہ اور سلمان علی آغا (نائب کپتان) کو شامل کیا گیا ہے۔
اسکواڈ میں وکٹ کیپر بیٹرز محمد رضوان (کپتان) اور عثمان خان بھی شامل ہیں۔
بولرز کے طور پر اسپنر ابرار احمد اور فاسٹ بولرز حارث رؤف، محمد حسنین، نسیم شاہ اور شاہین شاہ آفریدی کو شامل کیا گیا ہے۔
