تحریک انصاف (پی ٹی آئی) کے رہنما اسد عمر کا کہنا ہے کہ اسحاق ڈار نے مہنگائی میں کمی دکھانے کے لیے بتایا بجلی پچھلے سال سے 45.6 فیصد سستی ہو گئی ہے۔
مائیکروبلاگنگ ویب سائٹ ٹوئٹر پر جاری کیے گئے اپنے بیان میں سابق وفاقی وزیر اسدعمر نے کہا کہ عوام کی زندگی بجلی کی قیمتوں میں ہوشربا اضافے سے بدحال ہے۔
اسد عمر نے اسحاق ڈار کی اس پالیسی اور جھوٹ پر کہا کہ پہلے ظلم کیا اور اس پر دھوکا بھی دیا۔
یاد رہے کہ گزشتہ روز جیو نیوز کے پروگرام ’کیپٹل ٹاک‘ میں گفتگو کے دوران اسحاق ڈار نے کہا تھا کہ ڈالر کی موجودہ قدر حقیقی نہیں، جلد انشاء اللہ 200 روپے سے کم ہوگا۔
انہوں نے کہا کہ اپنی پالیسیوں کے تحت ڈالر کو 200 روپے سے کم پر لائیں گے۔ وزیرخزانہ نے کہا کہ ادارہ شماریات جو اعدادوشمار بتاتا ہے وہ درست ہوتے ہیں وہ ایک آزاد ادارہ ہے ہیرا پھیری نہیں کرتا۔
