سینئر قانون دان سلمان اکرم راجا نے کہا ہے کہ آرٹیکل 63 اے سے متعلق کیس پر نظرثانی کی درخواست پر سماعت کیلئے نیا بینچ نہیں بن سکتا۔
تفصیلات کے مطابق سماء نیوز کے پروگرام لائیو ود ندیم ملک میں گفتگو کرتے ہوئے سلمان اکرم راجا نے کہا کہ اگر آرٹیکل 63 اے کی تشریح کے معاملے پر یہ حکم نا دیا جاتا کہ جو ووٹ ڈال دیا گیا وہ شمار ہی نہیں ہوگااگر یہ تشریح نا ہوتی تو 16 اپریل کو حمزہ شہباز وزیراعلی منتخب ہوجاتے ۔
انہوں نے کہا کہ اگر وہ فیصلہ نا آتا تو نا ہی رن آف الیکشن کی ضرورت پیش آتی کیونکہ حمزہ شہباز 197 ووٹوں سے جیت گئے تھے، اس وقت اسی کیس میں نظرثانی کا کیس عدالت کے سامنے ہے وہ وہی پانچ رکنی بینچ ہی سنے گا ، نظرثانی کے کیس میں یہ بھی بند ش ہے کہ کیس اسی بینچ کے سامنے لگتا ہے اس کیلئے کوئی نیا بینچ تشکیل نہیں دیا جاسکتا۔
سلمان اکرم راجا نے کہا کہ اس وقت خطرناک صورتحال ہے ، ہمیں بحیثیت قوم اس ساری صورتحال کا تدارک کرنا ہے اور اس میں عدلیہ کو بھی اپنا حصہ ملانا ہے، عدلیہ کی ماضی کی جانب نظریں دوڑائیں تو اس میں حقیقی نوعیت کی شکایات موجود ہیں۔
انہوں نے کہا کہ اس وقت ضرورت اس بات کی ہے کہ معاشرے میں اداروں کا اعتماد بحال ہو اور اعتماد ایسے ہی بحال نہیں ہوجاتا اس کیلئےہر کسی کو اپنا حصہ ڈالنا پڑتا ہے۔
- Featured Thumbs
- https://www.siasat.pk/data/files/s3/13salmanakrmarajanewbech.jpg
