انٹرنیشنل مانیٹری فنڈ (آئی ایم ایف) کی ایک اور شرط پر عمل کرنے کیلئے حکومت نے آن لائن پیسے کمانے والوں پر ٹیکس بڑھانے پر غور شروع کر دیا ہے۔
نجی چینل اے آر وائی نیوز کا دعویٰ ہے کہ حکومت یوٹیوب اور ٹک ٹاک سمیت گیمز ودیگر آن لائن ذرائع سے کمائی کرنے والوں کی آمدنی پر ٹیکس بڑھانے پر غور کر رہی ہے۔ آئی ایم ایف کی شرط کے مطابق یوٹیوب کی اندرون ملک ادائیگیوں پر بھی ٹیکس بڑھانے پر غور کیا جا رہا ہے۔؎
اس حوالے سے ایف بی آر کا کہنا ہے کہ جلد ہی آن لائن پلیٹ فارمز کے دفاتر پاکستان میں قائم کیے جائیں گے اور ان سے آمدنی پاکستانی روپے میں حاصل کی جائے گی۔ اس کے علاوہ آئی ایم ایف کی شرط کے مطابق بجٹ میں انکم ٹیکس کی رعایتیں اور مراعات ختم کی جائیں گی۔
یہی نہیں بجٹ میں سالانہ 10 لاکھ روپے سے زائد کی آمدن والوں پر بھی ٹیکس بڑھانے کی بھی تجویز سامنے آئی ہے۔ دوسری جانب آئی ایم ایف نے اپنے پروگرام کیلئے سخت شرائط عائد کی ہیں اور حکومت سے یہ بھی مطالبہ کیا ہے کہ وہ الاؤنسز سمیت انکم ٹیکس کریڈٹ کو بھی کم کرے۔