koi ibaadat ya bandagi khudaa ke haan qaable qabool hai ya nahin is ka daaro madaar is baat per hai keh jo kuchh log khudaa ki ibaadat samajh ker kerte hen woh ibaadat hai bhi ya nahin. issi liye quraan ke context ko theek theek samajhna az bas laazmi hai. us ke baghair is baat ka faisla mumkin hi nahin hai.
quraan ke kissi aik lafz ya baat ko le ker us ko ibaadat qaraar nahin diya jaa sakta. quraan ka drust context sirf aur sirf ye hai keh khudaa ne kaainaat apne kisi maqsad ke liye banayee hai. issi liye sawaal peda hota hai woh maqsad kia hai ya kia ho sakta hai?
khudaa ne sirf aur sirf do kaam kiye hen aik ye keh is kaainaat ko peda kiya hai aur doosra insaanu ko apna paighaam diya hai. sochne ki baat ye hai keh ye do kaam khudaa ne kiye kyun hen? in do kaamun se khudaa kia haasil kerna chahta hai? lihaaza khudaa ka maqsade takhleeq jaanana insaanu ke liye az bas laazmi baat hai kyunkeh jo koi bhi iraadatan kuchh kerta hai usse se us ka koi na koi maqsad hota hai.
is nuqte ko bhi samajhne ki zaroorat hai keh jab bhi koi kuchh kerta hai to usse aik to us ka mojood hona zahir hota hai aur doosra usse us ki shakhsiyat zahir hoti hai. issi forum per hi dekh len keh jab ham aik doosre ke saath interaction yani bahmi radde amal kerte hen to yahee dono cheezen saamne aati hen.
issi baat ka taqaaza hai keh khudaa ne insaanu ko aik khaas maqsad ke liye peda kiya hai. kyunkeh agar khudaa aisi cheezen peda ker deta jo aqlo shaoor nahin rakhtin to woh khudaa ka maqsad poora hi nahin ker sakti thin. ye aisi hi baat hai keh aap akele hi is forum per apni baaten kerte rahen aur koi aap ki baaten padhne waala hi na ho. yani aap ko apni baaten sunaane ke liye ya apne kaam dikhaane ke liye koi chahiye. jo aap ko shabaash de ya aap ke kaam ko appreciate kare.
yahee wajah hai khudaa ko bhi khud ko apne kaamun yani herkatun se hi jaana jaa sakta tha lihaaza us ne ye sab kuchh banaa diya aur aik makhlooq aisi banaa di jis ko khudaa ne na sirf apni yani khudaa ki baatun ko samajhne ki salahiyat de di balkeh us ko un baatun per amal kerne ke qaabil bhi banaa diya. albatta us ne ye baat insaanu ki apni merzi per chhor di mehdood ikhtayaar de ker.
in baatun se saaf saaf zahir hai khudaa ne insaanu ko kis maqsad ke liye peda kiya hai. kia us ne apni pooja paat ke liye insaanu ko peda kiya hai? her giz nahin, is liye keh kia pooja paat bhi koi qaable qadar maqsad hai ya ho sakta hai? her giz nahin. khudaa ne apna maqsad poora kerne ke liye insaanu ko doosri tamaam ashiyaa se alag banaaya hai. in ko sab se badi shai aik zabardast dimaagh diya hai aur phir us dimaagh ke mutaabiq us ko hawaas diye hen. yahee nahin balkeh un ke ain mutaabiq insaanu ko jism aur azaa diye hen. yahee wajah hai sirf aur sirf insaan hi woh kaam ker skata hai jis ke liye khudaa ne us ko banaaya hai. insaan ko saamne rakh ker sochne se saaf saaf pata chalta hai ye aik khaas makhlooq hai khudaa ki.
is makhlooq ko khudaa ne apni pooja paat ke liye nahin balkeh aik bahot hi bade maqsad ke liye peda kiya hai. woh maqsad ye hai keh insaan khudaa ki baatun aur kaamun ko samajhne ki poori poori koshish kare apni madad aap ke teht, yani klhudaa ki dakhal andaazi ke baghiar. yahee wajah hai khudaa ne insaanu ko aik bache ki soorat main peda kiya hai jo kuchh bhi nahin jaanta magar cheezun ko seekhne ke qaabil hota hai aur bahot kuchh jaata hai waqt guzarne ke saath saath. insaanu ka kaam hai keh woh khudaa ki banayee hui duniya ko apni takhleeqi zehniyat se tor phor ker apne liye khoobsoorat banaayen. pujaari to aqlo fiker se kaam lene ke qaabil hi nahin hote woh baaqi kia karen ge?
sirf aqlo fiker se kaam lene waale hi khudaa ki kaaninaat per ghoro fiker ke liye apna aqal istemaal kerte hen. aur woh log woh woh kaam ker ke dikhaate hen jo un ko banaane waale ki qadrat ka izhaar karen. ye bhi koi kerne ka kaam hai keh insaan apni naak zameen per raggare aur apni tashreef hawaa main lehraaye? naak zameen per aur peeth khudaa ki taraf ye pose koi achhaa maloom nahin hota.
doosra zaraa sochen kia khudaa ne insaanu ko khud apne hi aage zaleelo kahawaar hone ke liye banaaya hai? ye baat bhi drust maloom nahin hoti. is liye keh khudaa aise bahuda kaamun se mubarra hai aur baala tar hai. woh chhote zehn ka maalik nahin hai aur na hi tang dast hai. yaheen se maloom hota hai khudaa ne insaanu ko bade bade kaam kerne ke liye peda kiya hai. pooja paat qatan koi aisa kaam nahin hai jisse insaani salahiytun ko barooe kaar laaya jaa sake.
insaanu main khudaa ne aisi aisi salahiyaten rakhi hen jinse woh khudaa ki banayee hui duniya main kayee tarah ki raddo badal ker sakte hen apni apni takhleeqi soch aur amal se. lihaaza insaan jis qadar khud ko chhota samjhen ge un ka khudaa bhi utna hi chhota ho ga aur jis qadar insaan khud ko badaa samjhen ge ussi qadar un ka khudaa bhi badaa ho ga. insaanu ke izzato waqaar hi main khud khudaa ki izzato waqaar chhupa huwa hai. lihaaza ye kaise mumkin hai khudaa apni takhleeq ko zaleelo ruswaa kare?
lihaaza khudaa ke baare main behuda baaten kerna insaanu ko her giz zaib nahin deta. lihaaza insaanu ko khudaa ke baare main ghalat baaten kerne se baaz rehna chahiye. mazhabi log khudaa per kayee tarah ke bohtaan baandate hen lihaaza logoon ko mazhabi zehniyat se nikalna chahiye aur deene islam ki taraf aana chahiye. is duniya main insaanu ki zillat khud insaanu hi ke haathun se ho rahee hai is liye keh insaanu ne apne apne chhote chhote zehnu main khudaaye barhaq ke bajaaye apne apne chhote chhote zehnoo waale khudaa banaaye huwe hen jin ki soch bhi inhi logoon ki tarah hai.
ab zaraa lafze abd per ghor karen, is ka matlab pooja paat kerne waala her giz nahin hai. is ka maana hai kaarinda yani kaam kerne waala ya nauker yani worker or servant or employee. woh jo koi kaam kare ya apna ya kisi ka kaam kare. ab sawaal peda hota hai khudaa ko workers ki kia zaroorat pesh aa gayee? woh kon se kaam hen jo khudaa khud nahin ker sakta apne liye. yahee maqsad hai khudaa ka insaanu ko peda kerne se.
yani khudaa chahta tha woh khud ko zahir kare kissi tareeqe se to us ne do kaam kiye jo main bataa chuka hun ooper yani takhleeqe kaaninaat aur wahee. lihaaza us ko aik lihaaz se koi shabaash dene waala chahiye tha, issi liye us ne insaanu ko peda kiya aur woh bhi unjaan shakal main. taa keh insaan khud apni madad aap ke teht sab kuchh apni khudaa daad salihiytun se maloom karen ya jo kuchh un ko karna pade woh karen is maqsad ke liye. khudaa ne un ko sirf ye bataaya hai keh unhen kerna kia hai aur usse maqsad kia haasil ho ga.
sab se pehle khudaa ne insaanu main se jo intahee aaqil aur kaam kerne ke liye mazboot tareen insan the un ko un main se chun liya apne kaam ke liye. kaam sirf ye tha keh insaan mil ker khudaa ke bataaye huwe raaste ke mutaabiq is duniya main jiyen taa keh woh maqsad poora ho jaaye jis ke liye insaanu ko khudaa ne peda kiya hai. woh maqsad ye tha keh insaan apne peda kerne waale ko theek tarah se pehchaane keh woh kaisa aalim hai aur kaisa qadeer hai. yahee wajah us ka diya gayaa is duniya main jeene ka nizaam insaanu ke liye us ki ilmiyat ko zahir kerta hai. jab us ka nizaam insaan qaaim ker len ge to ye duniya insaanu ke liye jannat ban jaaye gi. aisa log pooja paat se kabhi bhi nahin ker sakte. is liye insaanu ko aise kaam kerne hun ge jin se unke liye ye duniya jannat ban jaaye. unhi ko quraan amaale hasnah kehta hai namaaz roze ko nahin. paighambrun ne yahee kaam kiye issi liye un ki duniya main tareefen huin aur un ko shabaashiyan milen.
deene islam main yahee kaam hen insaanu ke kerne waale jo her insaan ko khudaa ke liye kerne hen aur issi main tamaam insaaniyat ki bhalayee hai. yahee wajah hai deene islam ka na mazhab muqaabla ker sakta hai na secularism. ye dono insaanu ko sirf aur sirf apne liye jeena sikhate hen, khudaa ke liye nahin. issi lioye insaan insaan ka dushman bana huwa hai kyun log ya to mazhabi hen ya secular. asal deene islam per aaj koi shakhs bhi nahin hai kyunkeh kisi ko bhi ye maloom hi nahin hai keh asal deene islam hai kia. lihaaza agar logoon ko apni ye duniya jannat banaani hai to us ka raasta sirf aur sirf aik hi hai aur woh hai quraan ki drust samajh aur us per saheeh tarah se amal.
issi liye paighambrun ko khudaa ne apni paighaam rasaani ke liye chuna aur un ke zariye sab ko apna paighaam pohnchaane ka bandobast kiya. yani un ko aik mission ya aasignment de ker bhaija. ab sawaaal peda hota hai woh mission kia tha? woh mission ye tha keh is duniya main unhune insaanu ko asal khudaa se mutaarif karaana tha saheeh tarah se taa keh jo jo naqli khudaa logoon ne apne pane zehnoo main ghade hen woh un ke zehnoo se khatam ho jaayen. jab aisa ho jaaye ga deene khudaa-wandi duniya pe ghaalib aa jaaye ga, aur log us ke mutaabiq rehna shuroo ker den ge. For a detailed explanation of things about the quran, deen of islam and pakistan see
HERE,
HERE,
HERE,
HERE,
HERE and
HERE.
