خیبر پختونخوا کے وزیر صحت تیمور خان جھگڑا نے صحت کارڈ سے متعلق خبروں کی وضاحت دیتے ہوئے کہا ہے کہ اس پروگرام کو بند کرنے کی خبریں من گھڑت ہے صوبائی حکومت یہ پروگرام چلانے کیلئے وفاقی حکومت کی محتاج نہیں ہے۔
تفصیلات کے مطابق خیبر پختونخوا کے وزیر صحت تیمور خان جھگڑا نے ٹویٹر پر ایک بیان جاری کیا جس میں ان کا کہنا تھا کہ صحت کارڈ پروگرام کو بند کرنے سے متعلق خبروں میں کوئی صداقت نہیں ہے، صوبے میں یہ ایک آزاد پروگرام ہے، اور ہم آئندہ کابینہ اجلاس میں اس حوالے سے قانون سازی بھی کرلیں گے۔
انہوں نے مزید کہا کہ اب تک صوبے میں تقریبا 11 لاکھ لوگ اس منصوبے سے مستفید ہوچکے ہیں،صرف مارچ کے مہینے میں صحت کارڈ سے فائدہ اٹھانے والے مریضوں کی تعداد 80 ہزار سے تجاوز کرگئی ہے۔
تیمور خان نے کہا کہ موجودہ وفاقی حکومت عمران خان کے شروع کیے گئے اس منصوبے کے حوالے سے ابھی خاموش ہے تاہم اس منصوبے کو رول بیک کرنا اب کوئی آپشن نہیں ہے، ہیلتھ کارڈ پروگرام جاری رہے گا کیونکہ یہ اس وقت لوگوں کی ڈیمانڈ بن چکا ہے اور انشااللہ آنے والے وقتوں میں یہ عمران خان کی کامیابیوں میں سے ایک میراث بنے گا۔