پاکستان سپرلیگ سیزن 7 کا میلہ جاری ہے، شائقین من پسند ٹیموں کے آفیشل ترانوں اور ویڈیوز کے بھرپور مزے لے رہے ہیں،لیکن ایسے میں پشاور زلمی کے حوالے سے ایک دعویٰ سامنے آگیا، احتشام علی نامی پاکستانی گرافکس ڈیزائنر نے دعویٰ کیا کہ ٹیم پشاور زلمی نے اجازت لیے بغیراُن کا لوگو ڈیزائن کاپی کیا ہے۔
ٹوئٹر پر احتشام علی نے لکھاکہ میں حال ہی میں پیش آنے والا واقعہ شیئرکرناچاہتا ہو، کچھ روزقبل میرے علم میں آیا کہ پاکستان کا سب سے مشہوربرانڈ پی ایس ایل کرکٹ فرنچائز پشاورزلمی میری اجازت کے بغیر تقریباً ایک سال سے میرامارخورڈیزائن کاپی کرکے بطوراپنامال تجارت استعمال کررہے ہیں۔
گرافک ڈیزائنر نے ٹویٹ میں مارخور لوگو ڈیزائن اور گلوکار فرحان سعید کی تصویرشیئرکی جس میں انہوں نے پشاور زلمی کے لوگو والی شرٹ پہن رکھی ہے،فرحان سعید نے فورٹیٹیوڈ بینڈ کے ساتھ پشاورزلمی کا ترانہ ہرقدم ہے زلمی گایا، جس میں ہانیہ عامراورعلی رحمان بھی شامل ہیں۔
احتشام علی کے ٹوئٹس پرصارفین نے اپنے تبصروں میں لکھا کہ انہیں کاپی رائٹ ایکٹ کے تحت کارروائی کرتے ہوئے پشاورزلمی آفیشلزسے جواب طلب کرنا چاہیے،گرافکس ڈیزائنر کو اُن کا ڈیزائن کاپی کرنے پر درخواست دائرکرنی چاہیے اورپشاور زلمی سے جواب طلب کرنا چاہیے۔
احتشام علی کے اس دعوے پر زلمی کی جانب سے کسی قسم کا کوئی ردعمل دیکھنے میں نہیں آیا،لیکن اس بحث سے ہٹ کر شائقین کرکٹ کا جوش و خروش دیدنی ہے، عوام اپنی من پسند ٹیم کو سپورٹ کرنے میں مصروف ہیں۔
آج پی ایس ایل کے دو میچز کھیلے جائیں گے،پہلے میچ میں لاہور قلندرز کا مقابلہ اسلام آباد یونائیٹڈ سے ہوگا،دوسرے میچ میں آج کراچی کے نیشنل اسٹیڈیم میں پشاور زلمی اور دفاعی چیمپئن ملتان سلطانز اِن ایکشن ہو گی۔
