ٹی 20 ورلڈ کپ سیمی فائنل، سوشل میڈیا صارفین کی جانب سے شعیب ملک کے کردار کی تعریف
ٹی 20 ورلڈ کپ کے دوسرے سیمی فائنل میں آسٹریلین اننگز کے 19 ویں اوور میں پاکستانی فاسٹ بولر حسن علی نے میتھیو ویڈ کا انتہائی اہم کیچ ڈراپ کیا جس نے میچ کا پانسہ بدل دیا۔
کیچ ڈراپ کرنے کے بعد حسن علی بہت دباؤ میں آگئے لیکن ایسے میں سابق کپتان شعیب ملک حسن علی کے پاس گئے ان کا حوصلہ بڑھایا اور تھپکی دی۔ کمنٹیٹرز اور اسٹیڈیم میں موجود شائقین نے بھی شعیب ملک کے اس کردار کی تعریف کی اور کہا کہ انہوں نے سینئر کھلاڑی ہونے کا حق ادا کر دیا۔
فضیلہ نے کہا کہ ہماری سپورٹ حسن علی کے ساتھ ہے اور شعیب ملک کی اس سے عزت اور بڑھی ہے۔
ایک صارف نے کہا کہ جس طرح شعیب ملک حسن کے پاس گئے اور کیچ چھوٹنے کے بعد انہیں ہمت دی کھیل کی اصل روح یہی ہے۔ بہت بڑی بات ہوتی ہے کہ ایسے وقت میں جب کوئی آپ کو سہارا دیتا ہے۔
شانی نامی صارف نے حسن علی کو برا بھلا کہنے والوں سے کہا کہ مہنگائی پر اپنا غصہ نکالو۔
اسامہ خلجی نے کہا کہ یہ اس میچ کا بہترین لمحہ تھا، انہوں نے کہا کہ ایک کھلاڑی کو اسی طرح کا ہونا چاہیے۔
عمر فاروق نے کہا کہ وہ حیران ہیں کہ لوگ اس طرح حسن علی کو کیوں کوس رہے ہیں جبکہ ہار جیت کھیل کا حصہ ہے۔ کچھ بھی ہو جائے یہی تو کھیل ہے۔ انہوں نے کہا کہ شعیب ملک نے اس وقت وہی کیا جو کہ کرنا چاہیے تھا۔ میری درخواست ہے کہ اس طرح حسن سے نفرت مت کیجیئے وہ ایک اچھا کھلاڑی ہے۔
