ٹک ٹاک کا جنون نوجوانوں کو کہاں سے کہاں لے گیا، نوجوان اس شوق کو پورا کرنے کیلیے جان کی پرواہ بھی نہیں کرتے، ایبٹ آباد کے ایک نوجوان نے ٹک ٹاک ویڈیو بنانے کیلیے جنگل کو ہی آگ لگادی۔
محکمہ جنگلات وائلڈ لائف ایبٹ آباد ریجن نے ٹک ٹاک ویڈیو بنانے کی خاطر جنگل کو آگ لگانے والے نوجوان کو گرفتار کر لیا،نوجوان قیمتی درخت کو آگ لگا کر ویڈیو بناتا رہا۔
ویڈیو جب منظر عام پر آئی تو محکمہ جنگلات و وائلڈ لائف نے سخت ایکشن لیتے ہوئے کئی گھنٹوں کی محنت کے بعد انتظامیہ نے نوجوان کو گرفتار کر لیا،محکمہ جنگلات و وائلڈ لائف کے حکام کا کہنا ہے کہ ملزم کے خلاف قانون کے مطابق کارروائی کے لیے مقدمہ درج کر لیا گیا ہے۔
دوسری جانب عوام کی جانب سے بھی نوجوان پر تنقید کی جارہی ہے،عابد مجید نے لکھا کہ جنگل مذاق نہیں نہ ہی سوشل میڈیا پوسٹ کیلیے مواد ہے۔
مراد علی محمد نے لکھا کہ نوجوان کو سرکاری مہمان بنایا جائے تاکہ دوسرا کوئی ایسی حرکت نہ کرے۔
واجد شاہ نے لکھا پہلے ٹمبر مافیا اب ٹک ٹاک مافیا۔
اس سے قبل بھی ٹک ٹاک ویڈیو بنانے کیلیے لاپرواہی کے واقعات رونما ہوچکے ہیں، نوجوان جان سے بھی جاچکے ہیں،ایک نوجوان چکلالہ سکیم تھری پھاٹک کے قریب ٹرین کی زد میں آکر جاں بحق ہوا تو گزشتہ سال کراچی میں آٹھ نوجوان جان سے گئے،دونوجوان نہر میں ڈوب گئے تھے۔