وزیراطلاعات سندھ سعید غنی نے سابق قومی کرکٹر محمد حفیظ کو سیاسی صورتحال پر تبصرہ کرنے پر کھری کھری سُنا دیں، کہتے ہیں کہ کرکٹ کھیلو، ملک سے مت کھیلو۔
تفصیلات کے مطابق گزشتہ روز محمد حفیظ نے قومی اسمبلی میں تحریکِ عدم اعتماد کے مسترد ہونے پر وزیراعظم عمران خان کی حمایت میں ٹوئٹ کرتے ہوئَے خوشی کا اظہار کیا تھا ۔
محمد حفیظ نےاپنی ٹوئٹ میں کہا کہ عمران خان ہمیشہ سے ایک حقیقی لیجنڈ ہیں۔
محمد حفیظ کے ٹوئٹ پر سعید غنی نے ردعمل دیتے ہوئے کہا کہ کرکٹ کھیلو ملک سے مت کھیلو۔
یادرہے کہ اس سے قبل ن لیگی ایم پی اے حنا پرویز بٹ بھی محمد حفیظ کے وزیراعظم عمران خان کے حق میں ٹویٹس پر شدید ردعمل کا اظہار کرچکی ہیں۔
کچھ روز قبل حنا پرویز بٹ نے سیاست ڈاٹ پی کے ہی کی خبر پر ردعمل دیتے ہوئے اس کو ری ٹوئٹ کیا اور حفیظ سے کہا کہ "منہ بند رکھیں اور چپ چاپ کرکٹ کھیلیں۔ ایک نااہل کو سپورٹ کرنے کی بالکل ضرورت نہیں۔سیاست سے آپ کا کوئی لینا دینا نہیں"
واضح رہے کہ گزشتہ روز قومی اسمبلی کے اہم اجلاس کی صدارت کرتے ہوئے ڈپٹی اسپیکر قاسم سوری نے وزیرِ اعظم عمران خان کے خلاف اپوزیشن کی تحریکِ عدم اعتماد کی قرار داد مسترد کر دی۔
بعد ازاں وزیراعظم عمران خان کی تجویز پر صدر مملکت ڈاکٹر عارف علوی نے قومی اسمبلی تحلیل کر دی تھی جبکہ عمران خان نے پارٹی ارکان کے اعزاز میں دیئے گئے عشائیے میں کہا تھا کہ اپوزیشن کو ابھی تک سمجھ ہی نہیں آ رہی کہ ان کے ساتھ کیا ہوا ہے۔