امریکی دارالحکومت واشنگٹن میں ہونے والی ایک تقریب میں سابق صدر باراک اوبامہ نے موجودہ صدر جو بائیڈن کومکمل طور پر نظر انداز کردیا۔
امریکی میڈیا رپورٹس کے مطابق وائٹ ہاؤس میں منعقد ہونے والی اس تقریب میں سب سے زیادہ غیر متعلقہ نظر آنے والی شخصیت کسی اور کی نہیں بلکہ خود امریکی صدر جو بائیڈن کی تھی۔
فاکس نیوز کی رپورٹ کے مطابق جوبائیڈن اس وقت سب سے غیر پاپولر امریکی لیڈر بن چکے ہیں جس کا ثبوت اس تقریب میں بھی واضح طور پر نظرآ یا ہے۔
تقریب میں دیکھا جاسکتا ہے کہ تمام شرکاء ایک دوسرے سے خوش گپیوں میں مصروف ہیں اور جو بائیڈن تنہا ادھر ادھر گھومتے دکھائی دے رہے ہیں ،اچھنبے کی بات تھی کہ دنیا کے سپر پاور کے سربراہ کو اس تقریب میں کوئی لفٹ کروانے کیلئے بھی تیار نہیں تھا اور یہ غیر معمولی بات جو بائیڈن بھی بغور دیکھ اور محسوس کررہے تھے۔
جو بائیڈن اسی تقریب میں شریک سابق امریکی صدر اوباما کو دیکھتے ہیں جنہیں لوگوں نے گھیر رکھا ہے اور سب لوگ ان سے بہت ہی خوشگوار موڈ میں گپے مارتے دکھائی دے رہے تھے، اپنی تنہائی کو دور کرنے کی کوشش میں جو بائیڈن اس جانب پہنچے مگر کسی نے ان کی آمد کا نوٹس نہیں لیا۔
یہاں تک کہ جو بائیڈن نے اپنی موجودگی کا احساس دلانے کیلئے اوباما کے کندھے پر ہاتھ بھی رکھا مگر سب سے ہاتھ ملانے والے اور گھل مل کر باتیں کرنے والے اوباما نے اس حرکت کو بھی نظر انداز کردیا اوراپنے اردگرد موجود لوگوں سے باتوں میں مصروف رہے۔
