ٹی 20 ورلڈ کپ کے دوران میچ شروع ہونے سے قبل گھٹنوں پر بیٹھنے سے انکار کرنے والے جنوبی افریقی وکٹ کیپر بیٹسمین کوئنٹن ڈی کاک کو ویسٹ انڈیز کے خلاف میچ میں ٹیم کا حصہ نہیں بنایا گیا۔
انٹرنیشنل کرکٹ کونسل کی آفیشل ٹی 20 ورلڈ کپ کی ویب سائٹ پر شائع کردہ ایک رپورٹ کے مطابق جنوبی افریقی وکٹ کیپر بیٹسمین کوئنٹن ڈی کاک نے ویسٹ انڈیز کے خلاف ورلڈ کپ کا اگلا میچ کھیلنے سے ذاتی وجوہات کی بنیاد پر معذرت کرلی ہے۔
رپورٹ کے مطابق یہ خبر اس وقت سامنے آئی جب جنوبی افریقی کرکٹ بورڈ کی جانب سے ایہ اعلامیہ جاری کیا گیا کہ ورلڈ کپ کے دوران تمام کھلاڑی میچز سے پہلے اپنے گھٹنوں پر بیٹھیں گے۔ کوئنٹن ڈی کاک ان جنوبی افریقی کھلاڑیوں میں شامل ہیں جنہوں نے ورلڈ کپ میں اپنے پہلے میچ سے پہلے گھٹنوں پر بیٹھ کر نسلی تعصب کے خلاف احتجاج میں حصہ نہیں لیا تھا، آسٹریلیا کے خلاف اس میچ میں کچھ کھلاڑی گھٹنوں پر بیٹھے تھے ، کچھ ایک ٹانگ پر بیٹھے اور کچھ بالکل سیدھے کھڑے رہے تھے۔
کھلاڑیوں کی جانب سے اس رویے کو دیکھتے ہوئے کرکٹ جنوبی افریقہ نے ایک واضح اعلامیہ جاری کیا جس میں کہاگیا کہ تمام کھلاڑیوں کو لازمی گھٹنوں پر بیٹھنا ہوگا۔
ڈی کاک کے ویسٹ انڈیز کے خلاف میچ میں شمولیت سے انکار کے حوالے سے کرکٹ جنوبی افریقہ نے بھی تصدیق کردی ہے کہ ڈی کاک نے اسی معاملے کے تناظر میں میچ کھیلنے سے انکار کیا ہے۔
کرکٹ جنوبی افریقہ کے بیان کے مطابق بورڈ نے ڈی کاک کے گھٹنوں پر نہ بیٹھنے کے فیصلےکا نوٹس لیا ہے، تمام کھلاڑی بورڈ کی ہدایات پر عمل درآمد کرنے کے پابند ہیں، اور تمام کھلاڑی متحد ہوکر گھٹنوں پر بیٹھ کر نسلی تعصب کے خلاف احتجاج کا حصہ ہوں گے۔ اس معاملے پر مزید کسی ایکشن سے پہلے بورڈ ٹیم مینجمنٹ کی رپورٹ کا انتظار کرے گی۔