ملک میں بحران سیاسی کردار کی وجہ سے ہے، فواد چوہدری
پاکستان تحریک انصاف کے رہنما فواد چوہدری کہتے ہیں کہ ملک میں بحران غیر منتخب اداروں کے سیاسی کردار کی وجہ سے ہے۔اسمبلیاں اس وقت عوام کی نمائندگی نہیں کر رہیں اور عوام حقیقی آزادی مارچ کے لیے باہر نکلیں۔
فواد چوہدری نے ٹویٹ میں لکھا کہ جمہوریت کا مذاق یہ ہے کہ اراکین پارلیمنٹ کی منڈی لگے، سندھ ہاؤس میں گائے، بھینسوں کی طرح ممبران کو خریدا اور بیچا جائے اور عدالتیں اسپیکر اور وزیراعظم کا فیصلے کا احترام نہ کرتے ہوئے ملک میں عام انتخابات روک دیں۔
ٹویٹ میں فواد چوہدری نے مزید لکھا کہ اسمبلیاں اس وقت عوام کی نمائندگی نہیں کر رہیں، عوام حقیقی آزادی مارچ کیلیے باہر نکلیں، ان بنائے گئے بتوں کو توڑنے کا وقت ہے، اسمبلیاں اسٹیٹس کو کی علامت ہیں، نظام میں شامل ہونا اس نظام کو تحفظ دینا ہے، ان بتوں کو توڑنے کیلئے عمران خان کی آواز پر لبیک کہو اور مارچ کی تیاری کرو۔
