ملکی اداروں کے خلاف سوشل میڈیا مہم چلائے جانے سے متعلق تحقیقات میں بھارت کے ملوث ہونے کا انکشاف ہوا ہے۔
خبررساں ادارے کی رپورٹ کے مطابق وفاقی تحقیقاتی ایجنسی(ایف آئی اے) نے انکشاف کیا ہے کہ ملکی اداروں کے خلاف نفرت آمیز مہم چلانے والے زیادہ تر سوشل میڈیا اکاؤنٹس بھارت سے آپریٹ ہورہے ہیں جبکہ یورپ سمیت کچھ اور ممالک سے بھی اس مہم میں حصہ ڈالا جارہا ہے۔
رپورٹ کے مطابق ایف آئی اے نے اداروں کے خلاف مہم کے الزام میں پاکستان تحریک انصاف کے سوشل میڈیا ورکرز کو حراست میں لیا تھا مگر دوران تحقیقات یہ انکشاف ہوا کہ اس مہم میں پی ٹی آئی کے بجائے بھارت ملوث ہے، اور پی ٹی آئی کے ورکرز کا ایسی مہم جوئی میں ملوث ہونے کے شواہد نہیں ملے۔
ایف آئی اے کے مطابق اب تک صرف شفقت مقصود نامی ایک سوشل میڈیا ایکٹیوسٹ کی جانب سے اداروں کے خلاف منظم مہم چلانے کے ثبوت ملے ہیں تاہم اس شخص کا کسی سیاسی جماعت سے کوئی تعلق نہیں ہے۔
ملزم شفقت مقصود کو ایف آئی اے کی جانب سے عدالت میں بھی پیش کیا گیا اور 14 روزہ جسمانی ریمانڈ دینے کی استدعا کی گئی، تاہم جوڈیشل مجسٹریٹ نے ایف آئی اے کی استدعا مستر د کرتے ہوئے ملزم کو 2 روزہ جسمانی ریمانڈ پر ایف آئی اے کے حوالے کردیا ہے۔