تنظیم الاسلامی پاکستان سے تعلق رکھنے والے مذہبی اسکالرز نے اسلاموفوبیا کے خلاف عمران خان کی غیر معمولی خدمات کو سراہا ہے۔
تفصیلات کے مطابق سابق وزیراعظم عمران خان نے اپنی رہائش گاہ بنی گالہ میں تنظیم الاسلامی پاکستان کے مرکزی عہدیداران پر مشتمل وفد سے ملاقات کی، اس موقع پر تحریک انصاف کے وائس چیئرمین شاہ محمود قریشی سمیت دیگر پارٹی رہنما بھی موجود تھے۔
عمران خان نے تنظیم الاسلامی پاکستان کے عہدیداران کا خیر مقدم کیا اور ملاقات میں باہمی دلچسپی کے امور پر تبادلہ خیال کیا، مذہبی اسکالرز نے اس موقع پر اسلاموفوبیا کے خلاف عالمی قرارداد کی منظور ی کے حوالے سے عمران خان کی غیر معمولی خدمات ،15 مارچ کو اسلاموفوبیا کے خلاف عالمی دن منائے جانے کے فیصلے اور رحمت اللعالمین ﷺ اتھارٹی کے قیام جیسے فیصلوں کو سراہا۔
اس موقع پر سابق وزیراعظم عمران خان نے گفتگو کرتے ہوئے کہا کہ قوم کو غلام بنانے کی منصوبہ بندی ہورہی ہے اس کیلئے انہیں تاریخی و تہذیبی ورثے سے دور کرنے کی کوششیں کی جارہی ہیں، مگر پاکستانی قوم سیاسی، معاشی اور معاشرتی غلامی کی زنجیریں توڑنے کیلئے بالکل تیار ہے اور ایسی قوم بن کر ابھر رہی ہے جو آزاد مملکت کے قیام میں کردار ادا کرنےو الے آباء کی یاد تازہ کردے گی۔
عمران خان نے مزید کہا کہ ہمارے بانیان کے سامنے ا سلامی اصولوں پر کھڑی مملکت تھی، تاہم مغربی تہذیب سے متاثر اشرافیہ نے قوم کو غلامی کی زنجیروں میں جکڑ ڈالا۔
عمران خان نے تنظیم الاسلامی پاکستان کے مذہبی اسکالرز کے توسط سے دینی،مذہبی شخصیات و جماعتوں کوحکومت مخالف لانگ مارچ میں شرکت کی دعوت بھی دی۔