لاہور ہائیکورٹ نے وزیراعلی پنجاب کے انتخاب سے متعلق فیصلے میں چند وی لاگرز کے خلاف کارروائی کیلئے وفاقی تحقیقاتی ایجنسی(ایف آئی اے) اور پیمرا کو ہدایات جاری کردی ہیں۔
خبررساں ادارے کی رپورٹ کے مطابق لاہور ہائی کورٹ نے حمزہ شہباز شریف کے بطور وزیراعلی انتخاب سے متعلق تحریری فیصلے میں کہا کہ اس کیس کی سماعت کے دوران الیکٹرانک اور پرنٹ میڈیا نے ذمہ دارانہ کردار ادا کیا جو قابل ستائش ہے۔
عدالتی فیصلے میں کہا گیا ہے کہ تاہم کچھ وی لاگرز نے عدالتی کارروائی کو متنازعہ بنانے کی پوری کوشش کی ، ایف آئی اے اور پیمرا ان وی لاگرز کے خلاف کارروائی عمل میں لائیں اور ان کے خلاف قانون کے مطابق ایکشن لیں۔
عدالت نے اپنے فیصلے میں ان وی لاگرز کے خلاف توہین عدالت کی کارروائی کا بھی عندیہ دیا اور کہا کہ اگر کوئی درخواست دے گا تو کارورائی کے بعد ان وی لاگرز کے خلاف توہین عدالت کی کارروائی بھی ہوگی۔
عدالتی کوریج کرنیوالے صحافی ثاقب بشیر کا اس پر کہنا تھا کہ دلچسپ امر ہے لاہور ہائی کورٹ نے آج کے فیصلے میں لارجر بنچ کی پروسیڈنگز کے دوران عدلیہ کو متنازع کرنے پر ویلاگرز کے خلاف ایف آئی اور پیمرا کو کاروائی کا حکم دے دیا
واضح رہے کہ لاہور ہائی کورٹ نے حمزہ شہباز شریف کے بطور وزیراعلی انتخاب کو کالعدم قرار دیتے ہوئے دوبارہ گنتی کا حکم دیدیا ہے،فیصلے میں کہا گیا ہے کہ 25 منحرف اراکین کو نکال کر اراکین کی دوبارہ گنتی کی جائے، جس کی اکثریت وہ جیت جائے گا۔