سماجی رابطے کی مقبول ترین ویب سائٹ ٹوئٹر اب اپنے صارفین کیلئے نیا فیچر متعارف کرایا ہے جس میں لوگ فیس بک گروپ کی طرح سے شامل ہو سکتے ہیں۔ یہ فیچر بالکل فیس بک کے گروپس جیسا ہو گا یا اس سے ملتا جلتا فیچر ریڈٹ میں سبریڈٹ کے نام سے بھی پایا جاتا ہے۔
یا یوں کہہ لیجیے کہ ٹوئٹر کمیونیٹیز ایک خاص موضوع سے دلچسپی رکھنے والے ٹوئٹر صارفین کا ایک گروہ ہوگی۔ کمیونیٹی میں کی جانے والی ٹویٹس کو اگرچہ تمام ٹوئٹر صارفین دیکھ سکیں گے تاہم صرف کمیونٹی کے ارکان ہی ان پر تبصرہ کرسکیں گے۔ یہ فیچر بالکل ویسا ہی ہے جیسا کہ فیس بُک میں "کلوزڈ گروپس" کا ہوتا ہے۔
ٹوئٹر انتظامیہ کے مطابق فیس بُک گروپ کی طرح اس میں بھی ایڈمن اور ماڈریٹر ہوں گے جو کمیونیٹی میں کی جانے والی ٹویٹس پر نظر رکھیں گے اور یقینی بنائیں گے کہ کمیونیٹی میں شامل تمام ارکان اس کے ضابطہ اخلاق کی پابندی کریں۔ توئٹر انتظامیہ کی جانب سے کمیونٹیز کے لیے ایک علیحدہ ٹوئٹر اکاؤنٹ بھی دیا گیا ہے جس کی تعارفی ٹویٹ میں ایک مختصر ویڈیو کے ذریعے "کمیونٹیز" کا طریقہ کار وضع کیا گیا ہے۔
مزید برآں ٹوئٹر کی آفیشل ویب سائٹ پر ایک بلاگ موجود ہے جس سے پتا چلتا ہے کہ فی الحال "کمیونٹیز" کا فیچر آزمائشی مرحلے پر ہے جس میں آئی او ایس (ایپل) اور ڈیسک ٹاپ ٹوئٹر صارفین کی ایک محدود تعداد ہی شریک ہے۔ یہ فیچر اینڈرائیڈ صارفین کیلئے بعد میں متعارف کرایا جائے گا۔
تاہم یہ بات قابل غور ہے کہ آپ صرف اسی صورت میں کسی کمونیٹی کا حصہ بن سکتے ہیں کہ جب اس کا ماڈریٹر یا کوئی رکن آپ کو انوائٹ کرے۔ اس کےلیے آپ کے پاس ٹوئٹر کا پبلک اکاؤنٹ ہونا ضروری ہے۔ یعنی ایک ایسا اکاؤنٹ جسے تمام صارفین دیکھ سکیں۔ ممبر بن جانے کے بعد آپ مزید پانچ افراد کو اُس کمیونیٹی میں شمولیت کی دعوت دے سکیں گے۔
