قومی کرکٹ ٹیم کے فاسٹ باؤلر حسن علی اور نجی ٹی وی چینل کے رپورٹر کے درمیان ایک پریس کانفرنس کے دوران نوک جھوک ہوئی ہے، واقعے کی ویڈیو منظر عام پرآنے کے بعد حسن علی ٹویٹر پر موضوع بحث بن گئے ہیں۔
واقعہ کچھ یوں ہوا کہ پاکستان سپر لیگ کی فرنچائز اسلام آباد یونائیٹڈ کے کوچ کے ہمراہ پریس کانفرنس کرتے ہوئے حسن علی سے نجی ٹی وی چینل جی این این کے رپورٹر انس سعید نے سوال کیا جس کو درمیان میں ٹوکتے ہوئے کہا " اگلا سوال"۔
حسن علی کی جانب سے اس ردعمل پر پریس کانفرنس میں موجود تمام صحافیوں نے قہقے لگادیے، انس سعید نے دوبارہ سوال کیا جس پر حسن علی نے دوبارہ یہی جواب دیا، انس سعید نے کہا کہ آپ میرا سوال پورا سن لیں مگر حسن علی نے پھر "اگلا سوال" کہا تو انس سعید نے کہایہ کوئی طریقہ نہیں ہے آپ جواب نہیں دینا چاہتے یہ آپ کا حق ہے مگر سوال سنے بغیر ایسا ردعمل سہی نہیں ہے۔
حسن علی نے انس سعید سے کہا کہ پہلے آپ ٹویٹر پر اچھی اچھی باتیں لکھنا شروع کریں پھر ہم آپ کوجواب دیں گے، کسی کے ساتھ پرسنل نہیں ہونا چاہیے، حسن علی کے ساتھ موجود اسلام آبادیونائیٹڈ کے عہدیدار حسن علی کو ٹھنڈا کرنے کی کوشش کی ۔
حسن علی پھر کہا کہ کیونکہ پی سی بی تو آپ کو روک نہیں سکتا ہمارے پاس تو اختیار ہے نا ، ساتھ موجود اسلام آباد یونائیٹڈ کے عہدیدار نے ایک بار پھر "حسن بس ، بس ، بس" کہہ کر انہیں روکا۔
سوشل میڈیا پر یہ کلپ وائرل ہونے کے بعد ٹویٹر پر حسن علی ٹرینڈنگ لسٹ میں آگئے اور صارفین نے اس معاملے پر ملے جلے ردعمل کا اظہار کیا، کچھ صارفین نے ایک صحافی کو اس طرح جواب دینے پر حسن علی کو تنقید کا نشانہ بنایا جبکہ کچھ صارفین حسن علی کے اس ردعمل کے حامی بھی نظر آئے۔
اس سے پہلے بھی دونوں کے درمیان تکرار ہو چکی تھی۔
