مسجد اقصیٰ کے امام شیخ عکرمہ صبری کا کہنا ہے کہ وزیر اعظم عمران خان کا فلسطین پر غیر متزلزل مؤقف قابلِ ستائش ہے، ہر صبح مسجد میں عمران خان کو دعاؤں میں یاد کرتا ہوں۔
تفصیلات کے مطابق وفاقی وزیر مذہبی امور نور الحق قادری کی شیخ عکرمہ صبری سے ویڈیو لنک پر بات چیت ہوئی جس میں مسجد اقصیٰ کے امام کا کہنا تھا کہ عمران خان کا فلسطین پر غیر متزلزل مؤقف قابلِ ستائش ہے، عمران خان کی طرح واضح اور غیر مبہم الفاظ میں کسی نے فلسطین کا ساتھ نہیں دیا، غزہ کی کشیدگی پر جاندار سفارت کاری اور وزیر خارجہ کے اقدامات نے دل جیت لیے۔
وفاقی وزیر مذہبی امور سے ورچوئل ملاقات میں گفتگو کرتے ہوئے انہوں نے کہا کہ امت اسلامیہ کے لیڈر عمران خان نے فلسطین کیلئے او آئی سی اور اقوام متحدہ میں موثر آواز بلند کی عمران خان کی صورت میں موثر آواز فلسطین کیلئے خوشی اور اطمینان کا باعث ہے، فلسطین کا بچہ بچہ عمران خان کی حمایت کا قرض دعاں کی صورت میں ادا کر رہاہے،ہر صبح مسجد اقصی میں عمران خان کو اپنی دعا میں یاد کرتا ہوں۔
اس موقع پر وزیر مذہبی امور پیر نور الحق قادری کا کہنا تھا کہ پاکستان بابائے قوم کے وقت سے اب تک فلسطین پر موقف سے پیچھے نہیں ہٹا، بابائے قوم اور عمران خان کے موقف کے تحت کسی صورت اسرائیل کو تسلیم نہیں کریں گے، اسرائیل ایک ناجائز اور خلاف قانون ریاست ہے جس نے خطہ کے امن کو برباد کر دیا، فلسطین کا مسئلہ سیاسی نہیں بلکہ قبلہ اول کی آزادی اور انسانی المیہ سے متعلق ہے۔
بیت المقدس کی حرمت ؛ تقدس کی بحالی اور آزادی پاکستانی قوم کی خواہش ہے، عمران خان مسئلہ فلسطین کے مؤقف سے ایک انچ بھی پیچھے نہیں ہٹیں گے، عمران خان فلسطین کیلئے غیر متزلزل حمایت کی سیاسی قیمت چُکا رہے ہیں۔
