وفاقی حکومت نے صحت، تعلیم، مواصلات سمیت باہتر ترقیاتی اسکیموں کے بجٹ میں کٹوتی کردی ہے، وفاقی حکومت نے یہ کٹوتی اپنی اتحادی جماعتوں کے 4 درجن کے قریب نئے منصوبوں کے لیے فنڈز کی فراہمی کی غرض سے کی ہے، یہ منصوبے پبلک سیکٹر ڈیولپمنٹ پروگرام میں اتحادیوں کی سفارش ہی پر شامل کیے گئے تھے۔
سرکاری دستاویزات کے مطابق ان 72 ترقیاتی اسکیموں کے لیے 22 ارب 80کروڑ روپے مختص کیے گئے تھے،جن میں گواد سیف سٹی پروجیکٹ، لائن آف کنٹرول کے ساتھ رہائش پذیر متاثرین کی آبادکاری اور ملک کے پسماندہ اضلاع کے لیے خصوصی ترقیاتی اقدام جیسی اسکیمیں بھی شامل ہیں۔
دوسری جانب لائن آف کنٹرول کے قریب بھارتی گولہ باری سے متاثرہ افراد کی بحالی کے 30کروڑ کے بجٹ میں 20کروڑ روپے کی کٹوتی کی گئی ہے، اسی طرح گوادر سیف سٹی پروجیکٹ کے 68کروڑ 80لاکھ کے باقی فنڈز میں 30کروڑ روپے کی کٹوتی کی گئی، اس طرح مجموعی طور پر 72ترقیاتی اسکیموں کے مختص کردہ بجٹ میں کٹوتی بھی کی گئی ہے۔