شین وارن کو کم تر باؤلر قرار دینے سے متعلق سنیل گواسکر کے بیان پر سوشل میڈیا صارفین پھٹ پڑے
سابق بھارتی کرکٹر سنیل گواسکر کی جانب سے آنجہانی شین وارن سے متعلق متنازعہ بیان دینے پر سوشل میڈیا پر ایک نئی بحث چھڑ گئی ہے۔
تفصیلات کے مطابق سنیل گواسکر نے اپنے تازہ ترین بیان میں کہا ہے کہ میں شین وارن کو مرلی دھرن اور بھارتی اسپنرز سے بہتر بولر نہیں سمجھتا، مرلی دھرن اور بھارتی اسپنرز کا ریکارڈ شین وارن سے زیادہ بہتر ہے۔
انہوں نے کہا کہ شین وارن کا بھارت کے خلاف ریکارڈ دیکھیں تو انہوں نے صرف ایک بار 5 وکٹیں حاصل کی تھیں، بھارتی کھلاڑی اسپنرز کو زیادہ اچھا کھیلتے ہیں، مرلی دھرن شین وارن کے مقابلے میں زیادہ کامیاب باؤلر ہیں، میں نے اپنی کتاب میں بھی شین وارن کو مرلی دھرن سے نچلے درجے پر رکھا ہے۔
سنیل گواسکر کے اس بیان پر سوشل میڈیا صارفین سخت ناراض ہوگئے ہیں، صارفین کا کہنا ہے کہ آنجہانی آسٹریلوی باؤلر سے متعلق ایسے گھٹیا بیان نہیں دیئے جانے چاہیے، ٹویٹر پر صارفین نے"ڈسگریس فل" کا ایک ٹرینڈ بھی چلادیا۔
ایک ٹویٹر صارف نے کہا کہ کیا سنیل گواسکر ایسا سچن ٹنڈولکر کے بارے میں بھی کہہ سکتے ہیں جنہوں نے میگرا کے خلاف خاطر خواہ کارکردگی نہیں دکھائی۔
ایک اور صارف نے کہا کہ سنیل گواسکر ایک انڈر ریٹڈ انسان ہیں، پیڈ میڈیا نے انہیں ان کی صلاحیتوں سے زیادہ اٹھا رکھا ہے، وہ کوئی عظیم انسان نہیں ہیں لوگ انہیں ہمیشہ ایک خود غرض انسان کے طور پر یاد رکھیں گے۔
ایک اور صارف نے کہا کہ سنیل گواسکر کی جانب سے یہ بہت بری گفتگو سامنے آئی ہے، ان کا شین وارن کو ایک عظیم باولر نہ کہنا شرمناک ہے۔
دیگر سوشل میڈیا صارفین نے سنیل گواسکر کو کڑی تنقید کا نشانہ بنایا۔
واضح رہے کہ آسٹریلیا کے لیجنڈری اسپنر شین وارن 2 روز قبل تھائی لینڈ میں حرکت قلب بند ہونے کی وجہ سے انتقال کرگئے۔تھے۔