شاہنواز دھانی کی ویڈیو سوشل میڈیا پر وائرل۔۔ دلچسپ تبصرے۔۔ سوشل میڈیاصارفین نے شاہنواز دھانی کو پاکستانی کرکٹ ٹیم کا وزیر خارجہ قراردیدیا
اسپورٹس رپورٹر احتشام الحق نے پاکستان اور اسکاٹ لینڈ کے مابین کھیلے جانے والے میچ کے بعد ایک ویڈیو سوشل میڈیا پر اپ لوڈ کی جس میں قومی کرکٹ ٹیم کو ڈریسنگ روم کے اندر حارث رؤف کی سالگرہ کا کیک کاٹتے دیکھا جا سکتا ہے۔
اس ویڈیو میں شاہنواز دھانی نہ صرف پاکستانیوں بلکہ غیر ملکی کھلاڑیوں میں کیک تقسیم کرتے ہوئے نظر آئے۔
پاکستان ورلڈ کپ کے سپر 12 مرحلے میں ناقابل شکست رہا ہے اور پہلی پوزیشن پر ہونے کے باعث اس کا مقابلہ آسٹریلیا کے ساتھ سیمی فائنل میں ہونے جا رہا ہے پاکستان نے سپر 12 مرحلے میں اپنا آخری اور پانچواں میچ سکاٹ لینڈ کے خلاف کھیلا جس کے بعد دونوں ٹیموں کے کھلاڑی ڈریسنگ روم میں ایک دوسرے کے ساتھ گھل مل گئے۔
تفصیلات کے مطابق میچ کے بعد قومی ٹیم کے فاسٹ بولر حارث رؤف کی سالگرہ کا کیک کاٹا گیا جس میں سکاٹ لینڈ کی ٹیم کو بھی شمولیت کی دعوت دی گئی۔ اس تقریب کی ویڈیو سوشل میڈیا پر وائرل ہوئی تو شاہنواز دھانی کے کردار کو سوشل میڈیا صارفین نے بہت سراہا اور کہا کہ وہ غیر ملکی کھلاڑیوں کے ساتھ تعلقات بہتر بنا کر ٹیم کے وزیر خارجہ کا کردار نبھا رہے ہیں۔
فضہ داؤد نے کہا کہ جب دھانی بہت بڑے کھلاڑی بنیں گے تو لوگ اس ویڈیو کو شیئر کیا کریں گے۔
آدی چشتی نے کہا کہ شاہنواز دھانی کو ٹیم نے مخالف کھلاڑیوں کو تسلیاں دینے کیلئے رکھا ہے۔