سپریم کورٹ نےسی سی پی او لاہور غلام محمود ڈوگر کو بحال کر دیا

supreme-court-gm-dogr-bl.jpg



سپریم کورٹ نے سی سی پی او لاہور غلام محمود ڈوگر کو بحال کر دیا،سروس ٹربیونل کے خصوصی بینچ کے فیصلے کیخلاف اپیل پر وفاقی حکومت کو نوٹس جاری کیا، وفاقی حکومت کو نوٹس غلام محمود ڈوگر کی اپیل پر جاری کیا گیا،جسٹس اعجاز الاحسن کی سربراہی میں تین رکنی بنچ نے سماعت کی۔

جسٹس اعجاز الاحسن کی سربراہی میں بنچ نے سروس ٹربیونل کےخصوصی بنچ کے فیصلے کیخلاف غلام محمود ڈوگر کی اپیل پر سماعت کی، وکیل عابد زبیری نے موقف اپنایا کہ غلام محمود ڈوگرکو فیڈرل سروس ٹربیونل نے بحال کیا تھا، سروس ٹربیونل کے دو رکنی بنچ نے بحالی کا فیصلہ معطل کردیا جو غیرقانونی تھا۔

حکومت کی نظرثانی درخواست بھی ٹربیونل میں زیرالتواء تھی ،جسٹس اعجاز الاحسن نے ریمارکس دیے ٹربیونل کا ایک بنچ دوسرے بنچ کا فیصلہ کیسے معطل کرسکتا ہے؟ خصوصی بنچ نے ایک جانب کہا درخواست قبل از وقت ہے، ساتھ ہی حکم معطل کردیا۔

جسٹس مظاہر نقوی نے کہاکہ لاہور ہاہیکورٹ نے کیسے کہہ دیا کہ آئینی درخواست قابل سماعت نہیں؟ وکیل عابد زبیری بولے کہ صوبائی حکومت سی سی پی او کو ریلیز نہیں کرنا چاہ رہی، سپریم کورٹ نے سی سی پی او لاہور غلام محمود ڈوگر کو بحال کرتے ہوئے وفاقی حکومت کو نوٹس جاری کردیے۔ سماعت غیرمعینہ مدت تک ملتوی کردی گئی۔ سپریم کورٹ آرڈر سے عمران خان پر قاتلانہ حملہ کی مشترکہ تحقیقاتی ٹیم بھی فعال ہو گئی۔