کراچی: پیپلز پارٹی نے 200 دنوں میں کیا کارنامہ انجام دیا ؟ آج نیوز نے سندھ سرکار کی کارکردگی کا پوسٹ مارٹم کردیا۔
صوبائی حکومت کے 43 میں سے 25 محکموں نے ترقیاتی فنڈز کو ہاتھ ہی نہیں لگایا۔ محکمہ اطلاعات، ایگریکلچر، ماحولیات، انفارمیشن اینڈ سائنس اور سوشل ویلفیئر کے محکموں کی کارکردگی صفر رہی۔
کھلاڑیوں کی سُو روزہ کارکردگی پر سوال اٹھانے والے جیالوں کی 200 روزہ کارکردگی کا آج نیوز کو موصول دستاویزات نے بھانڈا پھوڑ دیا۔
باتیں کروڑوں کی دُکان پکوڑوں کی، یہ محاورہ سندھ حکومت پر فٹ آتا ہے۔
سندھ میں تعلیم اور صحت کی ایمرجنسی ہے، مگر اس میں بھی ترقیاتی فنڈز صرف 20 فیصد استعمال ہوئے۔
بلدیات کی 418 اسکیموں کیلیے بھی کام نہ ہونے کے برابر رہا، 7 ماہ میں فنڈز کا استعمال صرف 18 فیصد رہا۔
سندھ میں ٹرانسپورٹ کا بُرا حال ہے، لیکن ٹرانسپورٹ اور ماس ٹرانزٹ کی 10اسکیموں کیلیے فنڈ کا صرف بیس فیصد استعمال ہوا۔
کچی آبادی، صنعت و تجارت اور اطلاعات کی کارکردگی بھی صفر رہی۔
صوبے کو ماحولیاتی تبدیلیوں کا سامنا ہے، ہر سال ہیٹ اسٹروک کئی زندگیاں لے جاتا ہے. لیکن محکمہ ماحولیات کی کارکردگی بھی صفر ہے۔
سندھ ایک زرعی صوبہ ہے لیکن المیہ دیکھیں کہ سات ماہ میں محکمہ زراعت نے بھی ترقیاتی فنڈ سے ایک دھیلا تک استعمال نہیں کیا۔
آئی ٹی، سوشل ویلفیئر، ترقی نسواں اور معذور افراد کی بحالی کے منصوبوں پر بھی کام نہ ہوا۔
بلاول بھٹو، وزیراعلیٰ اور چیف سیکریٹری سندھ بھی افسران کی کارکردگی سے ناراض ہیں، گزشتہ روز وزراء کی بھی ڈانٹ ڈپٹ ہوئی۔
http://urdu.aaj.tv/pakistan/200418/