سابق صوبائی وزیر رانا مشہود نے چودھری پرویز الہٰی پر الزام لگا دیا ہے کہ انہوں نے اپنے ذاتی غنڈوں کی مدد سے پنجاب اسمبلی پر قبضے کی کوشش کی ہے۔ انہوں نے گزشتہ روز صوبائی اسمبلی میں ہوئے ہنگامے سے متعلق کہا کہ سی سی ٹی وی فوٹیج نکال لی ہے ایکشن ہوگا۔
مسلم لیگ ن پنجاب کے رہنماؤں کے ہمراہ پریس کرنفرنس کرتے ہوئے رانا مشہود نے کہا کہ پی ٹی آئی نے قوم کو بدتمیزی سکھائی ہے، اسمبلی کے گرد تاریں لگا کر اسے نو گو ایریا بنا دیا گیا۔ چوہدری پرویز الہٰی نے اسمبلی پر قبضہ کرنے کی کوشش کی ہے۔
رانا مشہود نے کہا کہ کل پنجاب اسمبلی میں جو ہوا وہ جمہوریت کے لیے بدترین دھبہ ہے، کل پرویز الہٰی اور پی ٹی آئی کا اصل چہرہ عوام نے دیکھ لیا ہے۔ یہ ہر قیمت پر اقتدار سے چمٹے رہنا چاہتے ہیں، انہیں پاکستان سے محبت نہیں ہے۔
مسلم لیگ ن کے رہنما کا کہنا تھا ڈپٹی اسپیکر صاحب ایوان میں آئے تو ان پر حملہ کیا گیا۔ ڈپٹی اسپیکر نے پولیس کو اس لیے بلایا کیونکہ پہلے ان پر حملہ کیا گیا تھا۔ آج تک نہیں دیکھا کہ اسمبلی پر غنڈوں کی مدد سے قبضہ کیا گیا ہو۔
عطاء اللّٰہ تارڑ نے کہا کہ وزیرِاعلیٰ پنجاب کے الیکشن کو بار بار تاخیر کا شکار کیا گیا، کل پرائیویٹ لوگوں کو وردیاں پہنائی گئیں۔ ہم سے بلوچستان کی حکومت لی گئی، پھر سینیٹ کا الیکشن لیا گیا، مگر ہم ہمیشہ اداروں کومضبوط دیکھنا چاہتے ہیں۔
یاد رہے کہ گزشتہ روز پنجاب اسمبلی میں قائد ایوان کے انتخاب کیلئے ارکان جمع ہوئے تو ڈپٹی اسپیکر دوست مزاری پر حکومتی اراکین کی جانب سے تشدد کیا گیا جس کے بعد اسپیکر پرویز الہیٰ کو بھی تشدد کا نشانہ بنایا گیا۔
میڈیا سے گفتگو کرتے ہوئے چودھری پرویز الٰہی نے کہا کہ میری طبیعت بہت خراب ہے، مجھے مارنے کی کوشش کی گئی، یہ مجھے اپنی طرف سے ختم کرکے گئے ہیں، شہباز شریف کے فون پر یہ کارروائی ہوئی، میں ابھی بھی اسپیکر ہوں، یہ اسپیکر کے ساتھ ہو رہا ہے، میرا بازو توڑ دیا ہے، یہ ہے شریفوں کی جمہوریت ہے۔
