مہنگائی کے ستائے شہری جو ریلیف کے خواہشمند تھے ان سے وزیراعظم شہبازشریف نے کہا ہے کہ دعا کریں تیل کی قیمت کم اور بجلی سستی ہو تاکہ عوام کو ریلیف دیا جا سکے۔
اسلام آباد میں گرین اور بلیو لائنز بس سروس کی افتتاحی تقریب سے خطاب میں شہبازشریف نے کہا کہ ایک ماہ کےلیے یہ سفری سہولیات مکمل طور پر مفت ہونی چاہئیں، تیل کی قیمتوں میں اضافے نے پوری دنیا کو پریشان کررکھا ہے۔
انہوں نے کہا کہ ملک میں بجلی بہت مہنگی ہے، اللہ سے دعا کریں کہ جلد از جلد تیل کی قیمت کم ہوجائے تاکہ بجلی اور گیس سستی ہوسکے اور مہنگائی سے تباہ حال عوام کو ریلیف بھی دیا جا سکے، ہم سب کو اس کے لیے دعا کرنی چاہیے اور اللہ تعالی ہماری دعائیں قبول کریں گے۔
وزیراعظم نے مزید کہا عوامی فلاح کے منصوبے حکومت کی ترجیح ہیں، محنت سے ترقی کی منازل طے کریں گے، ہم ایک جامع منصوبہ بنا رہے ہیں جس میں ٹیوب ویلز، گھر، سرکاری دفاتر، عمارتوں، اسکولز کو شمسی توانائی پر منتقل کریں گے، 75 سال ہم نے پاؤں پر کلہاڑی ماری ہے۔
انہوں نے کہا کہ سیاسی حکومت اور فوجی آمریت سب نے مل کر ملک کی صورتحال کو بہتر نہیں کیا۔ آج کے اجلاس میں فیصلہ کریں گے کہ کس طرح عام گھرانوں کو سستے قرضے پر سولر پینل دیں تاکہ مہنگی بجلی سے جان چھوٹے، وزیراعلیٰ پنجاب کے مفت بجلی منصوبے سے 90 لاکھ گھرانوں اور 5 کروڑ 40 لاکھ افراد کو فائدہ ہوگا،
شہباز شریف نے کہا کہ اس منصوبے کیلئے 100 ارب روپے کا بجٹ ہے، باقی صوبے بھی امید ہے اچھے فیصلے کریں گے۔ ماضی کی حکومت نے انتہائی ناقص منصوبہ بندی کی، آئندہ منصوبوں میں غیرمعیاری ٹینڈرنگ ہوئی تو ملوث افراد کی خیرنہیں، عوامی منصوبوں کی ایسے نگرانی کریں جسےاپنے بچوں کی کرتے ہیں۔