لاہور قلندرز کے فاسٹ باؤلر حارث رؤف نےساتھ کھلاڑی کامران غلام کو کیچ چھوڑنے پر تھپڑ رسید کردیا، معاملے پر سوشل میڈیا پر گرما گرم بحث شروع ہوگئی ہے۔
تفصیلات کے مطابق پشاور زلمی کے خلاف میچ کے دوران حارث رؤف کی گیند پر نوجوان کھلاڑی کامران غلام نے پشاور زلمی کے بلے باز حضرت اللہ زازئی کیچ چھوڑ دیا ، کچھ دیر بعد حارث رؤف کے وکٹ لینے پر مبارکباد ینے کیلئے آنے والے کامران غلام کو حارث رؤف سے ایک زوردار تھپڑ پڑا تاہم کامران غلام نے غصہ کیے بغیر انہیں ہنستے ہوئے مبارکباد دی۔
سوشل میڈیا پر واقعہ کی ویڈیو آگ کی طرح پھیلی جس کےبعد ٹویٹر صارفین نے حارث رؤف کی اس حرکت کو سخت ناپسند کرتے ہوئے ان پر جرمانہ عائد کرنے کا مطالبہ کرنا شروع کردیا ہے۔
کوئٹہ گلیڈی ایٹرز کے ایک فین پیج پر جاری بیان میں کہا گیا کہ تھپڑ مارنے کے بعد حارث رؤف کا رویہ یہ ثابت کرتا ہے کہ انہوں نے تھپڑ مذاق میں نہیں مارا بلکہ اپنے برے رویے کی وجہ سےمارا، ان پر ایک میچ کی پابندی کے ساتھ ساتھ جرمانہ عائد ہونا چاہیے۔
صحافی و کالم نگار عمار احمد عباسی نے حارث رؤف کی اس حرکت کو شرمناک قرار دیتے ہوئے کہا کہ یہ سپورٹس مین سپرٹ نہیں ہے، کوئی بھی فیلڈر کیچ چھوڑنا نہیں چاہتا، کامران نے بھی اپنی طرف سے پوری کوشش کی مگر قسمت نے ان کا ساتھ نہیں دیا۔
اسپورٹس جرنلسٹ احتشام الحق نے اس بحث کو دھیما کرنے کی کوشش کرتے ہوئے اپنی ٹویٹ میں کہا کہ کہانی کو واضح ہونے دیں، حارث کا یہ تھپڑ مذاق بھی ہوسکتا ہے کیونکہ یہ سب آپس میں اچھے دوست ہیں، میں حارث رؤف کو جانتا ہوں وہ اتنےنیچ نہیں ہوسکتے۔
انہوں نے مزید کہا کہ پھر بھی اگر حارث رؤف نے واقعی سنجیدگی سے یہ تھپڑ مارا ہے میں ان پر تنقید کرنے والوں کی صف اول میں ہوں گا اور ان پر جرمانے کا مطالبہ کروں گا۔
صحافی ارفع فیروز نے کہا کہ ایسا لگتا ہے کہ حارث رؤف ڈیل اسٹین کے غصے سے متاثر ہیں، حارث نے کامران کے ساتھ وہی کیا جو ایک میچ میں ڈیل اسٹین نے اپنے وکٹ کیپر کوئنٹن ڈی کاک کے ساتھ کیا تھا۔
فرید خان نے کہا کہ حارث رؤف نے بدتمیزی کا مظاہرہ کیا، مجھے امید ہے وہ اس معاملے پر اپنا موقف ضروردیں گے، کامران مغل یا کوئی بھی اور فیلڈر جان بوجھ کر کیچ نہیں چھوڑتا ، اس معاملے کو ڈیل اسٹین سے تشبیہ دینے والوں کو یاد رکھنا چاہیے کہ ڈیل اسٹین واضح طور پر مذاق کررہے تھے اور انہوں نے اس کی وضاحت بھی کی تھی۔
محمد وقاص نے اس معاملے پر شاہین شاہ آفریدی سے بطور کپتان کردار ادا کرنے کا مطالبہ کیا اور کہا کہ کامران غلام نے بڑے پن کا مظاہرہ کرتے ہوئے بات کو بڑھنے نہیں دیا، اب حارث رؤف کو سزا دینے کا وقت ہے۔
رانا بلال نے بھی اس واقعہ کو شرمناک ، غیر پیشہ ورانہ عمل قرار دیا۔
حمزہ کلیم بٹ نے اس معاملے کو تنازع کی شکل نہ دینے کی اپیل کرتے ہوئے کہا کہ یہ آپس میں اچھے دوست ہیں ، حارث نے کامران کو تھپڑ نہیں مارا، اس واقعہ کے تھوڑی دیر بعد حارث رؤف نے کامران غلام کو گلے سے بھی لگایا،یہاں کچھ ٹی وی چینلز نے اس دوران حارث رؤف پر 2 سال کی پابندی کا مطالبہ بھی کر ڈالا ہے۔