پولیس نے رکن قومی اسمبلی ڈاکٹر عامر لیاقت کا گھر تفتیش مکمل ہونے تک سیل رکھنے کا فیصلہ کرلیا اور کہا گھر عامر لیاقت کے اصل وارث کے حوالے کریں گے۔ حکام کا کہنا ہے کہ ہمارے پاس اب تک گھر یا جائیداد کا دعویدار نہیں آیا، گھر عامر لیاقت کے اصل وارث کے حوالے کریں گے۔
تفصیلات کے مطابق رکن قومی اسمبلی ڈاکٹر عامرلیاقت حسین کا گھر سیل کرنے کے معاملے پر پولیس حکام نے کہا ہے کہ پولیس تفتیش مکمل ہونےتک گھرسیل رہے گا، کرائم سین کی فرانزک رپورٹ کا انتظار ہے، فائنل رپورٹ آنے کے بعد ہی گھر کھولا جائے گا۔
دوسری جانب پولیس کا کہنا ہے کہ نادرا سے مرحوم ڈاکٹر عامر لیاقت کا مکمل ڈیٹا حاصل کر لیا گیا ہے ، اب تک اصل وارثوں میں بیٹا احمد اور بیٹی دعا سامنے آئی ہے۔ نادرا ریکارڈ میں پہلی بیوی بشریٰ کا طلاق نامہ اور دوسری بیوی طوبی کا طلاق نامہ ریکارڈ پر ہے جبکہ تیسری بیوی دانیہ سے طلاق رجسٹرڈ نہیں۔
پولیس نے بتایا کہ دانیہ نے بہاولپور کی عدالت سے خلع دائر کی تھی ، خلع کی ڈگری اور طلاق فائنل ہونے کے بعد ہی ریکارڈ اپڈیٹ ہوگا، طلاق فائنل نہ ہونے پر دانیہ بھی وارث ہونے کا دعوی کرسکتی ہے۔
یاد رہے کہ گذشتہ روز رکن قومی اسمبلی عامر لیاقت کے بیٹے نے والد کی نماز جنازہ پڑھائی ، جس کے بعد انھیں عبداللہ شاہ غازیؒ کے مزار کے احاطے میں سپرد خاک کردیا گیا، ان کی نماز جنازہ میں ایم کیو ایم رہنماؤں، فاروق ستار سمیت دیگر سماجی شخصیات نے شرکت کی تھی۔
ڈاکٹر عامر لیاقت 9جون کے روز اپنے گھر میں مردہ پائے گئے تھے، جس کے بعد انہیں اسپتال منتقل کیا گیا ، جہاں ڈاکٹروں کی ان کی موت کی تصدیق کی۔
