مسلم لیگ ن کے سینئر رہنما اور سابق وزیراعظم شاہد خاقان عباسی کا کہنا ہے کہ آرمی چیف کی تعیناتی وزیراعظم کا حق ہے اس پر تنقید کی گنجائش نہیں، تعیناتی تو آج بھی ہو سکتی ہے مگر عمران خان نے اس پر پہلے ہی فیصلہ کر لیا تھا۔
نجی چینل آج نیوز کے پروگرام ’فیصلہ آپ کا‘ میں گفتگو کرتے ہوئے شاہد خاقان عباسی نے کہا کہ فارن آفس سائفر وصول کرتا رہتا ہے، جھوٹ کا ثبوت سامنے آگیا ہے، البتہ یہ کافی تشویشناک بات ہے کہ اب وزیراعظم کا دفتر بھی محفوظ نہیں ہے۔
اسحاق ڈار کی واپسی پر بغلیں بجانے والے اور معاشی پالیسیوں میں سدھار کے منتظر عوام کو شاہد خاقان نے بتایا کہ میرے خیال سے مفتاح اسماعیل اور اسحاق ڈار کی معاشی پالیسی میں کوئی فرق نہیں، البتہ اقتصادی فیصلے وزیراعظم ہی کرتے ہیں۔
انہوں نے کہا حکومت کوشش کر رہی ہے ملکی حالات پر قابو پایا جائے تاہم 4 سال کی غفلت 4 مہینے میں دور نہیں ہوسکتی۔ معیشت اگر عمران خان کے حوالے کردیتے تو ملک ہی ختم ہو جاتا لیکن اب حکومت ڈلیور کرے گی تو لوگ الیکشن میں اسے ووٹ دیں گے۔
سابق وزیراعظم نے یہ بھی کہا ہم نے آخری 15،16 مہینے میں حکومت لی ہے جس میں حالات ہماری توقع سے زیادہ خراب ہیں۔ الیکشن اپنے وقت پر ہوں گے، عمران کو بات کرنے سے کوئی روک نہیں سکتا، وہ اسمبلی میں آکر حکومت پر تنقید کریں، پارلیمان موجود ہے۔