آئی سی سی مینز ٹی 20 ورلڈ کپ سے بھارتی ٹیم کے باہر ہونے سے متعلق سابق پاکستانی کرکٹر مشتاق احمد نے کہا کہ آپ بھارتی کرکٹ ٹیم میں واضح طور پر دو گروپوں کو دیکھ سکتے ہیں، ایک ممبئی گروپ اور ایک دہلی گروپ ہے۔
مشتاق احمد نے پیشگوئی کی ہے کہ ویرات کوہلی اب نہ صرف کپتانی چھوڑیں گے بلکہ ٹی 20 کرکٹ سے بھی ریٹائر ہو جائیں گے۔ اُنہوں نے کہا کہ چیزیں اُسی وقت بدل گئی تھیں کہ جب ٹی 20 ورلڈ کپ سے پہلے ہی کوہلی نے اعلان کیا تھا کہ بطور کپتان یہ ان کی آخری ٹی 20 سیریز ہوگی۔
یاد رہے کہ بی سی سی آئی نے ویرات کے اس دعوے کی نفی کرتے ہوئے کہا تھا کہ یہ سچ نہیں ہے لیکن بعد میں ویرات کوہلی نے خود تصدیق کی تھی کہ وہ ٹی 20 ورلڈ کپ کے بعد کپتانی چھوڑیں گے۔ انہوں نے کہا جب کوئی کرکٹر کہتا ہے کہ وہ کپتانی چھوڑ دے گا تو اس کا مطلب ہے کہ ڈریسنگ روم میں کچھ گڑ بڑ ہے۔
ایک کھلاڑی کے طور پر، میں بتا سکتا ہوں کہ کوہلی کے ٹیم کے ساتھ تعلقات خاصے اچھے نہیں تھے۔ کیونکہ ورلڈ کپ میں ہارنے کے باوجود بھارتی ٹیم میں گروپنگ دیکھی جا سکتی ہے۔ انہوں نے اس کارکردگی کا ذمہ دار اس بائیو سیکیور ماحول کو بھی قرار دیا جس میں بھارتی کھلاڑی کئی مہینوں سے رہ رہے تھے۔
