پاکستان ویمن کرکٹ کی کپتان بسمہ معروف نے سب کی توجہ حاصل کررکھی ہے، میچ کے دوران اپنی بیٹی کے ساتھ میدان میں نظرآئیں، بسمہ کی اپنی بیٹی کے ساتھ تصویر سوشل میڈیا پر وائرل ہوئی تو سب نے ہی ماں کی محبت کو سراہا۔
بھارت کے لیجنڈ سابق کرکٹرسچن ٹنڈولکر بھی بسمہ اور ان کی بیٹی کی تصویر پر تبصرہ کئے بغیر نہ رہ سکے، سچن ٹنڈولکر نے بسمہ معروف کی بیٹی کے ساتھ تصویرکوخوبصورت لمحہ قراردے دیا۔
سچن ٹنڈولکرنے بسمہ معروف اوران کی بیٹی کی بھارتی ویمن کرکٹرزکے ساتھ تصویرٹویٹر پرشیئرکرتے ہوئے لکھا کہ یہ خوبصورت لمحہ ہے،کرکٹ کے میدان میں باؤنڈریز ہوتی ہیں لیکن میدان سے باہرکھیل سب کومتحد کرتا ہے۔
نیوزی لینڈ میں جاری ویمنز کرکٹ ورلڈ کپ کے موقع پرپاکستان اوربھارت کے درمیان میچ کے بعد بسمہ معروف اوران کی بیٹی کی بھارت کی خواتین کرکٹرز کے ساتھ تصویرسوشل میڈیا پرہر دل عزیز بنی ہوئی ہے۔
نائب صدر ن لیگ مریم نواز نے بسمہ معروف کی تصویر شیئر کرتے ہوئے لکھا تھا کہ یہ بہت طاقتور تصویر ہے،یہ دل موہ لینے والا منظر ہے، پاکستانی خواتین ترقی میں حائل شیشے کی چھت کو توڑ رہی ہیں۔ مریم نواز نے بسمہ معروف کی کامیابی کے لیے دعا کی اور اُن کی صاحبزادی فاطمہ کو بھی پیار دیا۔
