ملکی سیاست میں جوڑ توڑ روٹھنا منانا اور روابط کا سلسلہ جاری ہے، صوبائی وزیر سائنس اینڈ ٹیکنالوجی عاطف خان نے انکشاف کیا کہ مختلف لوگ ان سے رابطہ کررہے ہیں،انہوں نے ٹویٹ پر بتایا کہ پی ٹی آئی میں کچھ لوگوں سے ان کے اختلاف کی وجہ سے ان سے رابطے کیے جارہے ہیں،لیکن میں بتانا چاہتا ہوں کہ میرے اختلافات دور ہوگئے ہیں۔
صوبائی وزیر نے کہا کہ میں عمران خان کے ساتھ تھا اور انہی کے ساتھ رہوں گا،وزیراعظم عمران خان کے ہمراہ تصویر بھی شیئر کی،گزشتہ دنوں پی ٹی آئی کے مزید 3 ارکان قومی اسمبلی بھی سندھ ہاؤس پہنچے تھے جس کے بعد اجلاس میں شریک تحریک انصاف کے منحرف ارکان کی تعداد 22 ہوگئی۔
دوسری جانب پنجاب میں بھی جوڑ توڑ کا سلسلہ جاری ہے، مسلم لیگ نون کے صدر شہبازشریف اورحمزہ شہباز نے پی ٹی آئی کے مختلف گروپس سےٹیلی فونک رابطہ کیا، لیگی قیادت نےغضنفرعباس چھینہ سے پنجاب میں متحدہ اپوزیشن کے امیدوار کی حمایت کرنےکی درخواست کردی۔
ذرائع کے مطابق شہبازشریف اور حمزہ شہباز نے ترین گروپ کے اہم رہنماؤں سے بھی رابطہ کیا جن میں مثبت اشارے ملے ہیں،پیپلزپارٹی قیادت کا بھی آج ترین گروپ کے رہنماؤں سے ملاقات کا امکان ہے،وزیراعلی پنجاب کےامیدوار کی حمایت کے لئے ترین گروپ ،علیم گروپ،چھینہ گروپ کی مشاورت جاری ہے ،آج بھی غیررسمی مشاورتی اجلاس طلب کرلئے گئے ہیں،پیپلزپارٹی قیادت کا بھی آج ترین گروپ سےملاقات کا امکان ہے۔
