انگلش کرکٹ بورڈ دورہ پاکستان ختم کرنے کا ازالہ کرے گا


انگلش کرکٹ بورڈ دورہ پاکستان ختم کرنے کا ازالہ کرے گا، اگلے سال 7 ٹی ٹوئنٹی میچز پاکستان میں کھیلنے کی حامی بھرلی۔

انگلش کرکٹ بورڈ کے حکام نے لاہور کے قذافی اسٹیڈیم میں پاکستان کرکٹ بورڈ کے چیئرمین رمیز راجہ سے ملاقات کی۔

ملاقات میں فیصلہ کیا گیا کہ انگلش کرکٹ بورڈ دورہ پاکستان ختم کرنے کا ازالہ کرے گا، آئندہ سال آسٹریلیا میں ہونے والے ٹی ٹونٹی ورلڈ کپ سے پہلے انگلینڈ دورہ پاکستان میں 7 میچز کھیلے گی ۔


اس کے علاوہ آئندہ سال ٹی ٹوئنٹی ورلڈ کپ کے بعد انگلینڈ کی ٹیم تین ٹیسٹ میچز کھیلنے پاکستان آئے گی۔

ای سی بی چیف ایگزیکٹو ٹام ہیرسن کا کہنا تھا کہ انگلینڈ کرکٹ بورڈ پاکستان کرکٹ بورڈ کے ساتھ شاندار تعلقات کا خواہاں ہے۔


پی سی بی چیئرمین رمیز راجہ کا کہنا تھا کہ انگلینڈ کا2 اضافی ٹی ٹوئنٹی میچز کھیلنا خوش آئند ہے اور شائقین کرکٹ کے لیے بہترین خبر ہے۔

واضح رہے کہ ستمبرمیں انگلینڈ کا دورہ پاکستان منسوخ ہونے پر انگلش کرکٹ بورڈ شدید تنقید کی زد میں آگیا تھا، نہ صرف سابق برطانوی کرکٹرز بلکہ برطانوی وزیراعظم نے بھی ای سی بی کو کڑی تنقید کا نشانہ بنایا تھا۔

انگلش ٹیم کے دورہ پاکستان منسوخ ہونے پر پی سی بی اور انگلش کرکٹ بورڈ کے تعلقات میں تناؤ آگیا تھا اور چئیرمین پی سی بی رمیز راجہ نے سخت ردعمل کا اظہار کیا تھا۔
 
Advertisement
Sponsored Link