قومی ٹیم کو ایک اور دھچکا، آسٹریلیا کے خلاف پہلے ٹیسٹ میچ سے قبل قومی ٹیم کے فاسٹ باؤلر حارث رؤف کا کورونا وائرس ٹیسٹ مثبت آگیا۔
تفصیلات کے مطابق پاکستان کرکٹ بورڈ (پی سی بی) کی جانب سے حارث رؤف کےکورونا ٹیسٹ کا نتیجہ مثبت آنے کی تصدیق کردی گئی ہے، کرکٹ بورڈکا کہنا ہےکہ کرکٹر حارث رؤف کو قرنطینہ کردیا گیا ہے۔
کورونا ٹیسٹ مثبت آنے پر حارث رؤف آسٹریلیا کے خلاف تاریخی سیریز کے پہلے ٹیسٹ سے باہر ہوگئے، تاہم کرکٹ بورڈکا کہنا ہےکہ قومی اسکواڈ کے باقی تمام کھلاڑیوں کےٹیسٹ منفی آئے ہیں۔
حارث رؤف کی جگہ اب نسیم شاہ آسٹریلیا کے خلاف پہلے ٹیسٹ میں دستیاب ہوں گے۔
دوسری جانب سوشل میڈیا صارفین لاہور قلندر کے پلیئرز کی کورونا کے شکار عاقب جاوید سے ملاقات پر تنقید کر رہے ہیں۔
بریڈمین نامی صارف نے اپنے ٹوئٹر پیغام میں کہا کہ ایک دن پہلے پیش گوئی کی تھی یقیناً حارث رؤف کے بعد اور لوگوں کو بھی کووڈ پازیٹو ہو گا۔
ایک روز قبل بھی ڈون بریڈمین نے ٹوئٹ کی تھی جس میں کہا تھا کہ میرے خیال میں پاکستان کی ٹیسٹ ٹیم کے چند ممبران کووڈ کا شکار ہوں گےخصوصاً کلیدی باؤلرز کی کمی ہو سکتی ہے، کیونکہ کووڈ پازیٹو افراد کے ساتھ کھلاڑیوں کے جنگلی جشن دیکھے ہیں، آسٹریلیا کو فائدہ ہو گا۔
واضح رہے کی پی ایس ایل جیتنے کے بعد لاہور قلندرز کے پلیئرز نے آئسولیشن میں موجود عاقب جاوید سے بنا حفاظتی اقدامات کے ملاقات کی تھی جس کے بعد حارث رؤف کا کورونا پازیٹو آیا۔
خیال رہے کہ حارث رؤف آسٹریلیا کے خلاف ٹیسٹ سیریز کے لیے اعلان کردہ 15 رکنی سکواڈ کا حصہ تھے۔ اس سے قبل انجریز کے سبب فاسٹ بولر حسن علی ، آل راؤنڈر محمد نواز اور فہیم اشرف بھی آسٹریلیا کے خلاف پہلے ٹیسٹ سے باہر ہوگئے ہیں۔
واضح رہے کہ آسٹریلیا اور پاکستان کے درمیان پہلا ٹیسٹ 4 سے 8 مارچ کو راولپنڈی، 12 سے 18 مارچ کو کراچی اور 21 سے 25 مارچ کو لاہور میں کھیلا جائے گا۔
تینوں ایک روزہ میچ 29 مارچ، 31 مارچ اور 2 اپریل کو راولپنڈی سٹیڈیم میں کھیلے جائیں گے۔ جبکہ واحد ٹی 20 میچ 5 اپریل کو راولپنڈی سٹیڈیم میں کھیلا جائے گا۔
